୧୮ଜଣ ଶ୍ରମିକ ନିଖୋଜ ସହ ଜଣେ ମୃତ

ଅରୁଣାଚଳପ୍ରଦେଶରେ ଭାରତ-ଚୀନ ସୀମା ନିକଟରେ ଏକ ଦୁର୍ଘଟଣାରେ ଜଣେ ଶ୍ରମିକଙ୍କ ମୃତ୍ୟୁ ଘଟିଥିବା ବେଳେ ୧୮ଜଣ ଶ୍ରମିକ ନିଖୋଜ ଅଛନ୍ତି । ଏହି ଶ୍ରମିକମାନେ କୁରୁଙ୍ଗା କୁମେ ଜିଲ୍ଲାରେ ଏକ ରାସ୍ତା ପ୍ରୋଜେକ୍ଟ ଉପରେ କାମ କରୁଥିଲେ । ୫ଜୁଲାଇ ପରେ ଏହି ୧୯ ଶ୍ରମିକଙ୍କ କୌଣସି ପତ୍ତା କେହି ପାଉନଥିଲେ । ସୂଚନା ଅନୁସାରେ ଜିଲ୍ଲାର ଡେପୁଟି କମିଶନର କହିବାନୁଯାୟୀ, ଜଣେ ଶ୍ରମିକଙ୍କ ମୃତଦେହ ମଳିଥିବାବେଳେ ଅନ୍ୟ ନିଖୋଜ ୧୮ଜଣଙ୍କ ସନ୍ଧାନ ଜାରି ରହିଛି । ଭାରତ ଏବଂ ଚୀନ୍ ସୀମା ନିକଟରେ ଥିବା କୁରୁଙ୍ଗା କୁମେ ଜିଲ୍ଲାର ଦାମିନ ନାମକ ଏକ ଆଭ୍ୟନ୍ତରୀଣ ଅଞ୍ଚଳ ରହିଛି । ସଡକ ସୀମା ସଂଗଠନ (ବିଆରଓ) ଙ୍କ ତତ୍ତ୍ବାବଧାନରେ ଏକ ସଡ଼କ ପ୍ରକଳ୍ପରେ ଏହି କାର୍ଯ୍ୟ ଚାଲିଛି । ବିଆରଓ ଉତ୍ତର ପୂର୍ବରେ ଭିତ୍ତିଭୂମି ପ୍ରକଳ୍ପର ଏକ ବିସ୍ତୃତ ନେଟୱାର୍କ ସୃଷ୍ଟି କରୁଛି । ଏହି ମାଧ୍ୟମରେ ଦାମିନରେ କାମ କରାଇବା ଲାଗି ଶ୍ରମିକମାନଙ୍କୁ ଅଣାଯାଇଥିଲା । ଉପ ଜିଲ୍ଲାପାଳ, ବେଙ୍ଗିଆ ନିଧି ଏଏନଆଇକୁ କହିଛନ୍ତି ଯେ ଜୁଲାଇ ୫ ତାରିଖରୁ ଦାମିନରେ କାର୍ଯ୍ୟ କରୁଥିବା ୧୯ ଜଣ ଶ୍ରମିକ ନିଖୋଜ ହୋଇଯାଇଛନ୍ତି । ସେମାନଙ୍କ ମଧ୍ୟରୁ ଅଧିକାଂଶ ଆସାମର ବୋଲି ଜଣାପଡିଛି।