ମଣିପୁରରୁ ଆସିଲା ଆଉ ଏକ ଭୟାନକ ଭିଡିଓ

ଭାଇରାଲ ହେଲା ଆଉ ଏକ ଭୟାନକ ଭିଡିଓ । ବାଡ଼ ଉପରେ ଝୁଲୁଛି କଟା ମୁଣ୍ଡ । ମଣିପୁର ବିଷ୍ଣୁପୁର ଜିଲ୍ଲାରୁ ଆଉ ଏକ ଲୋମଟାଙ୍କୁରା ଭିଡିଓ ସାମନାକୁ ଆସିଛି । ଏଥିରେ ଜଣେ ବ୍ୟକ୍ତିଙ୍କ କଟା ମୁଣ୍ଡ ବାଉଁଶ ତିଆରି ବାଡରେ ଝୁଲାଯାଇଥିବା ଦେଖିବାକୁ ମିଳିଛି । କୁହାଯାଉଛି ଏହି କଟା ମୁଣ୍ଡ ଡେଭିଡ୍ ଥିକ୍ ନାମକ ଯୁବକର, ଯାହାକୁ ଜୁଲାଇ ୨ରେ ହିଂସା ସମୟରେ ହତ୍ୟା କରାଯାଇଥିଲା । ଏହି ହିଂସାରେ ୩ଜଣଙ୍କର ମୃତ୍ୟୁ ହୋଇଥିଲା । ମଣିପୁରରୁ ଗୋଟିଏ ପରେ ଗୋଟିଏ ଭୟାନକ ଭିଡିଓ ସାମନାକୁ ଆସୁଛି । ଏହା ପୂର୍ବରୁ କୁକି ସମ୍ପ୍ରଦାୟର ଦୁଇ ମହିଳାଙ୍କୁ ବିବସ୍ତ୍ର କରି ବିଚ୍ ରାସ୍ତାରେ ଚଲାଇ ଚଲାଇ ମାଡ ମାରି ନେଉଥିବା ଭିଡିଓ ଭାଇରାଲ ହୋଇଥିଲା, ଯାହାକୁ ନେଇ ଏବେ ସାରା ଦେଶରେ ହଇଚଇ ସୃଷ୍ଟି ହୋଇଛି । ତା ପରେ ପରେ କଟାମୁଣ୍ଡର ଏହି ଭିଡିଓ ସମସ୍ତଙ୍କୁ ସ୍ତବ୍ଧ କରିଛି ।  ତେବେ ମେ ୩ତାରିଖରେ କୁକି ସମ୍ପ୍ରଦାୟ ପକ୍ଷରୁ ‘ଆଦିବାସୀ ଏକତା ମାର୍ଚ୍ଚ’ ସମୟରେ ହିଂସା ସୃଷ୍ଟି ହୋଇଥିଲା । ଏହି ସମୟରେ କୁକି ଓ ମୈତେଇ ଦୁଇ ସମ୍ପ୍ରଦାୟ ମଧ୍ୟରେ ହିଂସା ଆରମ୍ଭ ହୋଇଥିଲା । ସେବେଠାରୁ ଆଜିଯାଏଁ ମଣିପୁରରେ ହିଂସା ଥମିବାର ନାଁ ନେଉନି । ଏବେଯାଏଁ ୧୫୦ରୁ ଅଧିକ ଲୋକଙ୍କ ମୃତ୍ୟୁ ହୋଇଥିବାବେଳେ ଅନେକ ବାସହରା ହୋଇଯାଇଛନ୍ତି ।