ବଢୁଛି ଅଡୁଆ; ସିସୋଦିଆଙ୍କ ସମେତ ୧୪ ଜଣଙ୍କ ବିରୋଧରେ ଲୁକଆଉଟ୍ ନୋଟିସ୍ ଜାରି

ଅବକାରୀ ଦୁର୍ନୀତି ମାମଲା । ମନୀଷ ସିସୋଦିଆଙ୍କ ସମେତ ୧୪ ଜଣଙ୍କ ବିରୋଧରେ ଲୁକଆଉଟ୍ ନୋଟିସ୍ ଜାରି କରିଛି ସିବିଆଇ । ଜାରି ହୋଇଥିବା ସର୍କୁଲାରରେ ସିବିଆଇ ସମସ୍ତ ୧୪ ଜଣ ବ୍ୟକ୍ତିଙ୍କ ନାଁ ଉଲ୍ଲେଖ କରି ଏଫଆଇଆର ଦାଏର କରିଛି । ତେବେ ଏହି ସର୍କୁଲାର ଅନୁସାରେ ମନୀଷ ସିସୋଦିଆ ଓ ଅନ୍ୟ ବ୍ୟକ୍ତିମାନେ ଦେଶ ବାହାରକୁ ଯାଇପାରିବେ ନାହିଁ । ଯଦି ଏପରି କରନ୍ତି ତେବେ ସେମାନଙ୍କୁ ହେପାଜତରେ ନିଆଯିବ । ସିବିଆଇ ରେଡ ପରେ ମନୀଷ ସିସୋଦିଆ ଏକ ସାମ୍ବାଦିକ ସମ୍ମିଳନୀ ଡକାଇ ମୋଦୀ ସରକାରଙ୍କ ଉପରେ ବର୍ଷିଥିଲେ । ଦିଲ୍ଲୀ ଶିକ୍ଷା କ୍ଷେତ୍ରରେ ଅଗ୍ରଗତି କରୁଥିବାରୁ ଏହାକୁ ପ୍ରଧାନମନ୍ତ୍ରୀ ସହିପାରୁନାହାଁନ୍ତି ବୋଲି ସେ କହିଥିଲେ ।