ନନ୍ଦନକାନନ ପ୍ରାଣୀ ଉଦ୍ୟାନରେ ନୂଆ ଅତିଥି

ନନ୍ଦନକାନନ ପ୍ରାଣୀ ଉଦ୍ୟାନକୁ ଆସିଲା ହାତୀ ଛୁଆ । କେନ୍ଦୁଝରର ଘଟଗାଁ ଅଞ୍ଚଳରୁ ଉଦ୍ଧାର ହୋଇଥିବା ୨ ମାସର ହାତୀ ଛୁଆକୁ ନନ୍ଦନକାନନ ଅଣାଯାଇଛି । କିଛି ଦିନ ତଳେ ସେଠାକୁ ୧୨ ଟିକିଆ ହାତୀ ପଲ ଆସିଥିଲେ । ବନ ବିଭାଗ କର୍ମଚାରୀ ଘଉଡାଇ ରେଳ ଲାଇନ୍ ପାର କରାଇବା ପରେ ଜଙ୍ଗଲକୁ ବାହୁଡି ଥିଲେ ହାତୀ ପଲ । ହେଲେ ଏକ ଖାଲ ଭିତରେ ହାତୀ ଛୁଆଟି ଗଳି ପଡିଥିବାର ଦେଖିବାକୁ ମିଳିଥିଲା । ତାକୁ ସେଠାରୁ ଉଦ୍ଧାର କରିଥିଲେ କେନ୍ଦୁଝର ବନ କର୍ମଚାରୀ । ପରେ ଜଙ୍ଗଲରେ ନେଇ ଛାଡିବାରୁ ଛୁଆଟିକୁ ହାତୀ ପଲ ଓ ତାର ମା’ ଗ୍ରହଣ କରି ନଥିଲେ । ଶେଷରେ ବାଧ୍ୟ ହୋଇ କେନ୍ଦୁଝର ବନ କର୍ମଚାରୀ ହାତୀ ଛୁଆଟିକୁ ଆଣି ନନ୍ଦନକାନନକୁ ହସ୍ତାନ୍ତର କରିଛନ୍ତି । ହାତୀ ଛୁଆଟିକୁ ନନ୍ଦନକାନନ ପ୍ରାଣୀ ଚିକିତ୍ସା କେନ୍ଦ୍ର ପରିସରର କର୍ମଚାରୀ ହେପାଜତ କେନ୍ଦ୍ରରେ ସ୍ୱାସ୍ଥ୍ୟ ପରୀକ୍ଷା କରି ରଖାଯାଇଛି । ଛୁଆଟିକୁ ମିଶାଇ ନନ୍ଦନକାନନର ମୋଟ ହାତୀ ସଂଖ୍ୟା ୪କୁ ବୃଦ୍ଧି ହୋଇଛି ।