ଖୋଲିବ ସ୍କୁଲ: ପିଲାଙ୍କ ମନୋରଞ୍ଜନ ପାଇଁ କରାଯିବ ରଙ୍ଗାରଙ୍ଗ କାର୍ଯ୍ୟକ୍ରମ

ଭୁବନେଶ୍ୱର: ଫେବୃଆରୀ ୨୪: ଦୀର୍ଘ ଦିନର ଅପେକ୍ଷା ଓ କରୋନା କଟକଣା ପରେ ରାଜ୍ୟରେ ସମସ୍ତ ସ୍କୁଲ ଖୋଲିବାକୁ ନିଷ୍ପତ୍ତି ହୋଇଛି । ଆସନ୍ତା ୨୮ ତାରିଖରୁ ଖୋଲିବ ରାଜ୍ୟର ସମସ୍ତ ସ୍କୁଲ । ସ୍କୁଲ ଖୋଲିବା ପୂର୍ବରୁ ସମସ୍ତ ପ୍ରକାର ପ୍ରସ୍ତୁତି ସାରିଛନ୍ତି ରାଜ୍ୟ ସରାକାର । ପିଲାମାନେ କିପରି ଦୀର୍ଘ ଦିନ ପରେ ସ୍କୁଲ ଆସି ପାଠ ପଢାରେ ମନ ଲଗାଇ ପାରିବେ ଏବଂ ନିଜର ଆଗ୍ରହ ବିକାଶ କରିପାରିବେ, ଏ ସମ୍ପର୍କରେ ସମସ୍ତ ତଥ୍ୟ ସେମାନଙ୍କ ଘରୁ ହିଁ ଆରମ୍ଭ ହେବା କଥା । ସେଥିପାଇଁ ୨୮ରେ ସ୍କୁଲ ଖୋଲିବା ପୂର୍ବରୁ ୨୬ରେ ହେବ ପ୍ୟାରେଣ୍ଟ ମିଟିଂ । ୨୫ରୁ ୨୮ ତାରିଖ ସ୍କୁଲ ପରିଚାଳନା କମିଟିଙ୍କୁ ପରିଚାଳନା ପ୍ରଶିକ୍ଷଣ ଦିଆଯିବ । ପ୍ରଥମ ସପ୍ତାହରେ ପିଲାଙ୍କର ପାଠ ପଢା ପରିବର୍ତ୍ତେ ସାମାଜିକ ଶିକ୍ଷା ଉପରେ ଗୁରୁତ୍ୱ ଦିଆଯିବ । ଏହି ୬ ଦିନ ଖେଳକୁଦ, ନାଚ, ଗୀତ, ବିଭିନ୍ନ ପ୍ରତିଯୋଗିତା ଆଦି ମାଧ୍ୟମରେ ପିଲାଙ୍କ ମନ ସ୍କୁଲ ସହ ଲାଗି ରହିବାକୁ ପ୍ରୟାସ କରାଯିବ । ଏହାପରେ ପରବର୍ତ୍ତୀ ତିନି ଦିନରେ ପିଲାଙ୍କର ତିନୋଟି ପରୀକ୍ଷା କରାଯିବ । ତିନି ଦିନରେ ଛାତ୍ରଛାତ୍ରୀ ଗଣିତ, ସାହିତ୍ୟ ଓ ଇଂରାଜୀ ଭାଷାରେ ଦକ୍ଷତା ପରୀକ୍ଷା ଦେବେ । ମାର୍ଚ୍ଚ ୯ରେ ଭାଷା, ୧୦ରେ ଗଣିତ ଓ ୧୧ ତାରିଖରେ ଇଂରାଜୀ ପରୀକ୍ଷା କରାଯିବା ନେଇ ସୂଚନା ଦିଆଯାଇଛି।