ଆନ୍ଧ୍ରର ସ୍ବାର୍ଥ ପାଇଁ ମାଲକାନଗିରିର ସ୍ବାଭିମାନ ସହ ସାଲିସ୍ କରାଯିବନି। ଆଦିବାସୀ ଓ ଅଧିବାସୀଙ୍କ ଦାବି ପାଇଁ ଲଢ଼େଇ ଜାରି ରହିବ। ପ୍ରକଳ୍ପର ଉଚ୍ଚତା ହ୍ରାସ ସହ ଜଳ, ଜମି, ଜଙ୍ଗଲର ସୁରକ୍ଷା ପ୍ରତି ଧ୍ୟାନ ଦିଅ। ପ୍ରଭାବିତ ଅଞ୍ଚଳବାସୀଙ୍କୁ ଉଚିତ କ୍ଷତିପୂରଣ ସହ ଥଇଥାନ କର। ନଚେତ୍ ଆଗାମୀ ଦିନରେ ଜୋର୍ଦାର ବିରୋଧ ହେବ। ଆନ୍ଧ୍ରରେ ନିର୍ମିତ ବହୁ ପ୍ରତୀକ୍ଷିତ ପୋଲାଭରମ (ଇନ୍ଦିରା ସାଗର) ପ୍ରକଳ୍ପକୁ ନେଇ ମୋଟୁରେ ଆୟୋଜିତ ହୋଇଛି ବିଶାଳ ସମାବେଶ। ମିଳିତ କ୍ରିୟାନୁଷ୍ଠାନ କମିଟି ପକ୍ଷରୁ ତହସିଲ ପଡ଼ିଆରେ ଆୟୋଜିତ ସମାବେଶରେ ତିନି ରାଜ୍ୟର ନେତା ଯୋଗଦେଇ କେନ୍ଦ୍ର ଓ ରାଜ୍ୟ ସରକାରଙ୍କ ବିରୋଧରେ ଏମିତି ଗର୍ଜିଛନ୍ତି। ତୁରନ୍ତ ପୋଲାଭରମ୍ ପ୍ରକଳ୍ପ କାର୍ଯ୍ୟ ବନ୍ଦ କରିବା ସହିତ ଉଚ୍ଚତା ହ୍ରାସ କରିବାକୁ ଦାବି କରିଥିଲେ।
ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭର୍ଚୁଆଲ ମୋଡ୍ରେ ଯୋଗଦେଇ କହିଥିଲେ, ପୋଲାଭରମ ପ୍ରକଳ୍ପ ମାଲକାନଗିରିର ଆଦିବାସୀ ଭାଇଭଉଣୀଙ୍କ ସ୍ବାର୍ଥ ବିରୋଧୀ। ଏହି ପ୍ରକଳ୍ପ ବିଷୟରେ ଗୋଦାବରୀ ନଦୀ କୂଳସ୍ଥ ରାଜ୍ୟଗୁଡ଼ିକ ସହିତ ଆଲୋଚନା କରି ନିଷ୍ପତ୍ତି ନେବା ପାଇଁ ସୁପ୍ରିମକୋର୍ଟଙ୍କ ଆଦେଶକୁ ମଧ୍ୟ ଉପେକ୍ଷା କରାଯାଇଛି। ମୁଖ୍ୟମନ୍ତ୍ରୀ ଥିବା ସମୟରେ ବିରୋଧ କରିଥିଲେ ଏବେ ବି ପ୍ରକଳ୍ପକୁ ବିରୋଧ ଜାରି ରଖିବେ। ଓଡ଼ିଶାର ଦାବିକୁ ଅଣଦେଖା କରି କେନ୍ଦ୍ର ସରକାର ପୋଲାଭରମ୍କୁ ଆର୍ଥିକ ଅନୁଦାନ ଯୋଗାଇ ଚାଲିଛନ୍ତି। ପ୍ରକଳ୍ପ ଦ୍ବାରା ମାଲକାନଗିରି ଜିଲ୍ଲାର କାଲିମେଳା, ପଡିଆ, ମାଥିଲି ମାଥିଲି ବ୍ଲକ୍ ଅଞ୍ଚଳ ବୁଡ଼ିବା ସହ ବହୁ ପରିବାର ବାସହୀନ ହେଉଥିଲେ ମଧ୍ୟ ଓଡ଼ିଶାରେ ଶାସନ କରୁଥିବା ଡବଲ ଇଞ୍ଜିନ୍ ସରକାର ଚୁପ୍ ବସିଛି। ରାଜନୈତିକ ଆବଶ୍ୟକତାକୁ ଦୃଷ୍ଟିରେ ରଖି ବିଜେପି ପ୍ରକଳ୍ପକୁ ସମର୍ଥନ କରୁଛି। ବିଜେପି ପାଇଁ ତାଙ୍କ ଦଳର ସ୍ବାର୍ଥ ଆଦିବାସୀଙ୍କ ସ୍ବାର୍ଥ ଠାରୁ ବଡ଼। ଓଡ଼ିଶାର ଜଣେ ଆଦିବାସୀ ନେତା ବର୍ତ୍ତମାନ କେନ୍ଦ୍ର ଆଦିବାସୀ ବ୍ୟାପାର ବିଭାଗ ଦାୟିତ୍ବରେ ଥିବାରୁ ଓଡ଼ିଶାର ଆଦିବାସୀଙ୍କ ସ୍ବାର୍ଥର ସୁରକ୍ଷା ପାଇଁ ସେ ନିଶ୍ଚିତ ଉଦ୍ୟମ କରିବେ ବୋଲି ନବୀନ ଆଶାପ୍ରକଟ କରିଥିଲେ।
More Stories
ତିନି ବର୍ଷ ଭିତରେ ପ୍ରତି ଜିଲ୍ଲାରେ ହେବ କ୍ୟାନସର୍ କେୟାର୍ ସେଣ୍ଟର୍
ପାୱାର ପାଇବା ପରେ ଆକ୍ସନ୍ ମୋଡରେ ଭକ୍ତ ଚରଣ ଦାସ୍
ବିଦ୍ୟୁତ୍ ଦରକୁ ନେଇ ରାଜ୍ୟ କଂଗ୍ରେସର ତାତି