୮ରେ ଉପସ୍ଥାପନ ହେବ କାମଚଳା ବଜେଟ

ରାଜ୍ୟରେ ଫେବୃଆରୀ ୫ରୁ କାମଚଳା ବିଧାନସଭା ଅଧିବେଶନ । ୧୩ ତାରିଖ ପର୍ଯ୍ୟନ୍ତ ଚାଲିବ ଏହି ଅଧିବେଶନ । ଷୋଡଶ ବିଧାନସଭାରେ ଏହା ଶେଷ ଅଧିବେଶନ ହେବ । କାରଣ ଆଗକୁ ବିଧାନସଭା ଓ ସାଧାରଣ ନିର୍ବାଚନ ଅଛି ।

୫ ତାରିଖରେ ରାଜ୍ୟପାଳଙ୍କ ଅଭିଭାଷଣ ରହିଛି । ୮ରେ କାମଚଳା ବଜେଟ ଉପସ୍ଥାପନ କରିବେ ଅର୍ଥମନ୍ତ୍ରୀ ବିକ୍ରମ କେଶରୀ ଆରୁଖ । ଅନ୍ତିମଥର ପାଇଁ ବିଧାନସଭାର ଶୀତକାଳୀନ ଅଧିବେଶନ ଚାରି ଦିନ ପାଇଁ ଚାଲିଥିଲା । ନଭେମ୍ବର ୨୬ କାର୍ଯ୍ୟଦିବସର ଶେଷ ତାରିଖ ଥିଲା । ହେଲେ ନଭେମ୍ବର ୨୪ରୁ ଅନିର୍ଦ୍ଦିଷ୍ଟ କାଳ ପାଇଁ ମୁଲତବୀ ରହିଥିଲା ।

୮ ତାରିଖରେ ଅର୍ଥମନ୍ତ୍ରୀ ବିକ୍ରମ କେଶରୀ ଆରୁଖ ଗୃହରେ କାମଚଳା ବଜେଟ୍‌ ଆଗତ କରିବେ । ଏହା ମୋସନ ଆକାରରେ ଗୃହରେ ଆଗତ ହୋଇ ଆଲୋଚନା ହେବ । ତା’ ପରଦିନ ଅର୍ଥାତ ୯ ତାରିଖରେ ବ୍ୟୟମଞ୍ଜୁରୀ ବିଲ୍‌ ପାରିତ ହେବ । ୧୦ ଓ ୧୧ ତାରିଖ ଶନିବାର ଓ ରବିବାର ପାଇଁ ଛୁଟି ରହିବ । ୧୨ ତାରିଖରେ ସରକାରୀ କାର୍ଯ୍ୟ ଦିବସ ଓ ୧୩ ତାରିଖରେ ଘରୋଇ ସଦସ୍ୟଙ୍କ କାର୍ଯ୍ୟଦିବସ ରହିଛି ।