କିଡନି ଖରାପ କରେ ଭିଟାମିନ୍-ସି ଯୁକ୍ତ ଚା..

ସନ୍ଦୀପ ଚୱନ ନାମରେ ଜଣେ ୪୨ ବର୍ଷିୟ ବ୍ୟକ୍ତିଙ୍କ ଅସୁସ୍ଥତା ନିରୂପଣ କରିବା ବେଳେ ମୁମ୍ବଇ ମହାନଗର ନିଗମଦ୍ବାରା ପରିଚାଳିତ ‘କେଇଏମ୍‌ ହସ୍ପିଟାଲ୍‌’ର ଡାକ୍ତରମାନ‌େ ଏହା ଜାଣିପାରିଛନ୍ତି।

ଗୋଡ଼ ଫୁଲିବା ସହିତ ସନ୍ଦୀପଙ୍କୁ ବାନ୍ତି ଓ ଅରୁଚି ଲାଗୁଥିଲା। ଦୁଇ ସପ୍ତାହ ପରୀକ୍ଷା ନିରୀକ୍ଷା ଓ ତାଙ୍କ ଜୀବନଚର୍ଯ୍ୟା ବିଶ୍ଳେଷଣ କରିବାରୁ ଜଣାଗଲା ଯେ, ତାଙ୍କ କିଡ୍‌ନି କାମ କରୁନାହିଁ। ସନ୍ଦୀପ ଦୈନିକ ଅନେକ କପ୍‌ ଭିଟାମିନ୍‌ ସି ମିଶ୍ରିତ ଚା ପିଉଥିଲେ।

ଏକା ସନ୍ଦୀପ ନୁହନ୍ତି, ଗତ ୭ ମାସ ହେବ ଭିଟାମିନ୍‌-ସି ମିଶ୍ରିତ ଫିକା ଚା ପାନ କରି ଆଉ ଜଣେ କିଡ୍‌ନି ରୋଗରେ ଆକ୍ରାନ୍ତ ହୋଇଥିବା ରୋଗୀ ଆସିଥିଲେ ବୋଲି ‘କେଇଏମ୍‌ ହସ୍ପିଟାଲ୍‌’ କହିଛି।

‘କେଇଏମ୍‌ ହସ୍ପିଟାଲ୍‌’ର ଡିନ୍‌ ଡାକ୍ତର ସଙ୍ଗୀତା ରାୱତ୍‌ କହିଛନ୍ତି, କୋଭିଡ୍‌-୧୯ ସମୟରେ ଫିକା ଚା ପିଇବା ଲୋକଙ୍କର ସଉକ ହୋଇଗଲା। କିନ୍ତୁ, ଭିଟାମିନ୍‌ ସି ମିଶ୍ରିତ ଫିକା ଚା ସମସ୍ତଙ୍କ କ୍ଷେତ୍ରରେ ଅସୁବଧା ସୃଷ୍ଟି କରେନାହିଁ। ଯେଉଁମାନଙ୍କ ଦେହରେ କିଡ୍‌ନି ରୋଗ ଭଳି ସମସ୍ୟା ଲୁକ୍‌କାୟିତ ହୋଇ ରହିଥାଏ, ସେମାନେ ଏ ଚା ପିଇଲେ ରୋଗାକ୍ରାନ୍ତ ହୋଇପଡ଼ନ୍ତି। ଏହାଛଡ଼ା, ଉଚ୍ଚ ରକ୍ତଚାପ ଓ କିଡ୍‌ନି ପଥୁରୀ (ଷ୍ଟୋନ୍‌) ଥିଲେ ବି ଏଭଳି ସ୍ବାସ୍ଥ୍ୟଗତ ସମସ୍ୟା ବଢ଼ିଯାଇଥାଏ।

‘କେଇଏମ୍‌ ହସ୍ପିଟାଲ୍‌’ର ପୂର୍ବତନ ମୂତ୍ରରୋଗ ବିଶେଷଜ୍ଞ ଡାକ୍ତର ଏନ୍‌. କେ. ହାସେ କହିଛନ୍ତି, ‌ଯେକୌଣସି ଜିନିଷ ମାତ୍ରାଧିକ ଖାଇଲେ ସମସ୍ୟା ସୃଷ୍ଟି ହୁଏ।