ରାଜ୍ୟ କ୍ୟାବିନେଟରେ 9ଟି ପ୍ରସ୍ତାବରେ ବାଜିଲା ମୋହର

ରାଜ୍ୟ କ୍ୟାବିନେଟରେ 9ଟି ପ୍ରସ୍ତାବରେ ମୋହର ବାଜିଛି । ଦକ୍ଷତା ବିକାଶ ଓ କୌଶଳ, ସାଧାରଣ ପ୍ରଶାସନ, ପଞ୍ଚାୟତିରାଜ, ପାନୀୟ ଜଳ ବିଭାଗର ବିଭିନ୍ନ ଗୁରୁତ୍ବପୂର୍ଣ୍ଣ ନିଷ୍ପତ୍ତି ନିଆଯାଇଛି । ଚୁକ୍ତିଭିତ୍ତିକ ନିଯୁକ୍ତି ପ୍ରଥା ଉଚ୍ଛେଦ । ଓଡ଼ିଶା ମୁଖ୍ୟ ବିଭାଗୀୟ ଦପ୍ତର ନିୟମାବଳୀରେ ସଂଶୋଧନ । ସହକାରୀ ଉପବିଭାଗ ଅଧିକାରୀ ପଦବୀରେ ବରିଷ୍ଠଙ୍କୁ ନିଯୁକ୍ତି । ସମନ୍ବିତ ବୈଷୟିକ ସେବା ନିଯୁକ୍ତି ପ୍ରକ୍ରିୟା ନିୟମାବଳୀ 2022ର ପ୍ରଣୟନ ନେଇ ନିଆଯାଇଛି ଗୁରୁତ୍ବପୂର୍ଣ୍ଣ ନିଷ୍ପତ୍ତି । ବିଭିନ୍ନ ବୈଷୟିକ ପଦବୀରେ ନିଯୁକ୍ତି ପାଇଁ ଏଣିକି ଏକକ ପରୀକ୍ଷା ହେବ । ଖ-ବର୍ଗ ଆଶାୟୀ ଏକକ ପରୀକ୍ଷା ପାଇଁ ଆବେଦନ କରିପାରିବେ । ସେହିପରି ନୟାଗଡ଼ ଜିଲ୍ଲାରେ ହେବ ଦୁଇଟି ବୃହତ୍ତ ଗ୍ରାମ୍ୟ ପାନୀୟ ଜଳ ଯୋଗାଣ ପ୍ରକଳ୍ପ । ଜଳ ଜୀବନ ମିଶନ, JJM ଯୋଜନାରେ ରଣପୁର ଓ ଓଡ଼ଗାଁରେ ହେବ ପ୍ରକଳ୍ପ । ଉପକୃତ ହେବ 429 ଟି ଗ୍ରାମର ଲୋକେ । ପ୍ରକଳ୍ପ ପାଇଁ 395 କୋଟିରୁ ଅଧିକ ଟଙ୍କାର ଟେଣ୍ଡରକୁ ଅନୁମୋଦନ ମିଳିଛି । ସେହିପରି ବରଗଡ଼ ଜିଲ୍ଲାରେ ହେବ ବୃହତ୍ତ ଗ୍ରାମ୍ୟ ପାନୀୟ ଜଳ ଯୋଗାଣ ପ୍ରକଳ୍ପ । ଆମ୍ବଭୋନା, ଭଟଲି ଓ ସୋହେଲାରେ ହେବ ପ୍ରକଳ୍ପ । ଉପକୃତ ହେବେ 316 ଟି ଗ୍ରାମର ଲୋକ । ପ୍ରକଳ୍ପ ପାଇଁ 453 କୋଟିରୁ ଅଧିକ ଟଙ୍କାର ଟେଣ୍ଡରକୁ ଅନୁମୋଦନ ମିଳିଛି । ଖୋର୍ଦ୍ଧା ଜିଲ୍ଲାରେ 5ଟି ବୃହତ୍ତ ପାନୀୟ ଜଳ ଯୋଗାଣ ପ୍ରକଳ୍ପକୁ ମଞ୍ଜୁରୀ ମିଳିଛି । ପ୍ରକଳ୍ପ ପାଇଁ 456 କୋଟିରୁ ଅଧିକ ଟଙ୍କାର ଟେଣ୍ଡରକୁ ମିଳିଛି ଅନୁମୋଦନ । କଳାହାଣ୍ଡିର 2 ଟି ଗ୍ରାମ୍ୟ ପାନୀୟ ଜଳ ଯୋଗାଣ ପ୍ରକଳ୍ପକୁ ଅନୁମୋଦନ ମିଳିଥିବାବେଳେ 4 ଜିଲ୍ଲାରେ 11 ବ୍ଲକ ପାଇଁ ଗ୍ରାମ୍ୟ ପାଇପ ଜଳ ଯୋଗାଣ ପ୍ରକଳ୍ପ ନିର୍ମାଣ ହେବ ।