କମିଶନରେଟ୍ ପୋଲିସ ହାତରେ ଧରାପଡ଼ିଥିବା ଠକ ପ୍ରେମିକ ସତ୍ୟଜିତ ସାମଲଙ୍କ କାରନାମାର ଗୁମର ଫିଟୁଛି । ୪୯ ନୁହେଁ, ଶହେରୁ ଅଧିକ ଯୁବତୀଙ୍କୁ ପ୍ରେମ ଜାଲରେ ଫସାଇଥିଲା ସତ୍ୟଜିତ । ପୋଲିସ ଅଧିକାରୀ କହିଛନ୍ତି, ସତ୍ୟଜିତ ୫ ଜଣଙ୍କୁ ବିବାହ କରିଛି କିନ୍ତୁ ଶହେରୁ ଅଧିକ ଯୁବତୀଙ୍କୁ ପ୍ରେମ ଜାଲରେ ଫସାଇଛି । ଏଭଳି କରିବାର ମୁଖ୍ୟ ଉଦ୍ଦେଶ୍ୟ ହେଲା, ପ୍ରେମିକାମାନଙ୍କଠାରୁ ଟଙ୍କା ହଡ଼ପ କରି ଅୟସ କରିବା । ୬ଟି ଦେଶର ଭାଷା ଜାଣିଛି ସତ୍ୟଜିତ । ଲୁଟ୍ ପଇସାରେ ସେ ୩ଟି ଦେଶ ବୁଲି ସାରିଛି । ଆଉ କିଛି ଦେଶ ବୁଲିବାକୁ ଯୋଜନା କରୁଥିଲା । ଏବେ ତାକୁ ମାରାଥନ ଜେରା କରାଯାଉଛି ଏବଂ ଏଥିସହିତ ତା’ର ଲାପ୍ଟପ୍ ଓ ପେନ୍ ଡ୍ରାଇଭ୍ରେ ଥିବା ଗୋପନ ତଥ୍ୟଗୁଡିକୁ ଖୋଳତାଡ଼ କରାଯାଉଛି। ବୁଧବାର ତା’ର ରିମାଣ୍ଡ ଅବଧି ସରୁଥିବାରୁ ପୁଲିସ ତା’କୁ ଘନଘନ ଜେରା କରୁଛି।
ପୁଲିସ ସତ୍ୟଜିତ୍କୁ ନେଇ ତା’ର ପଟିଆସ୍ଥିତ ଭଡ଼ା ଘରେ ଛାନ୍ଭିନ କଲା ବେଳେ ଗୋଟିଏ କଳା ରଙ୍ଗର ଡାଏରୀ ଜବତ କରିଛି । ସେଥିରେ ସେ କେତେ ନମ୍ବର ସ୍ତ୍ରୀଠାରୁ କେତେ ଟଙ୍କା ନେଇଛି, କେତେ ନମ୍ବର ପ୍ରେମିକାଠାରୁ କେତେ ଟଙ୍କା ପାଇଛି, ସେସବୁ ମଧ୍ୟ ରହିଛି। ସେହିଭଳି କେଉଁ କେଉଁ ସଂସ୍ଥାରେ ସେ ଟଙ୍କା ବିନିଯୋଗ କରିଛି, ସେସବୁ ହିସାବ ମଧ୍ୟ ଡାଏରିରେ ରହିଛି। ତେଣୁ ଅଧିକ ଖୋଳତାଡ଼ ହେବା ପରେ ତା’ର କଳା ସାମ୍ରାଜ୍ୟର କାରନାମା ପଦାକୁ ଆସିବ। କିନ୍ତୁ ଗୁରୁତ୍ବପୂର୍ଣ୍ଣ ତଥ୍ୟ ମିଳିବ ଲାପ୍ଟପ୍ ଓ ପେନ୍ ଡ୍ରାଇଭ୍ରୁ। ସେଥିରେ କିଛି ସମ୍ବେଦନଶୀଳ ତଥ୍ୟ ଥିବା ଅନୁମାନ କରାଯାଉଛି। ବ୍ଲାକ୍ମେଲ୍ ପାଇଁ ସେ ବ୍ୟବହାର କରୁଥିବା କିଛି ଅଶ୍ଳୀଳ ଭିଡିଓ ଥିବା ସନ୍ଦେହ କରାଯାଉଛି। ଜଣାପଡ଼ିଛି ଯେ ବିଭିନ୍ନ ବାହାନାରେ ସ୍ତ୍ରୀ ବା ପ୍ରେମିକାଙ୍କଠାରୁ ଟଙ୍କା ନେଇଥାଏ ଏବଂ ପରେ ଫେରାଇବ ବୋଲି ପ୍ରତିଶ୍ରୁତି ଦେଇଥାଏ।
ମହିଳାମାନେ ଟଙ୍କା ମାଗିବା ସମୟ ହେଲେ ସେ ବିଦେଶ ଉଡ଼ିଯାଏ। ସରକାରୀ ତଦନ୍ତ କାମରେ ସେ ଦୁବାଇ ବା ସାଉଦି ଆରବ ଯାଇଛି ବୋଲି କହିଦିଏ। ସେ ନିଜକୁ କ୍ରାଇମ୍ବ୍ରାଞ୍ଚ ଅଧିକାରୀ, ଗୁଇନ୍ଦା ଅଧିକାରୀ ବୋଲି କହିଥିବାରୁ ମହିଳାମାନେ ବିଶ୍ବାସ କରନ୍ତି। ସେହିଭଳି ସେ ନିଜକୁ ରିଆଦ୍ରେ କାମ କରୁଥିବା ପାଇଲଟ୍ ବୋଲି କହିଥାଏ। ତେଣୁ ଟଙ୍କା ମାଗୁଥିବା ମହିଳାମାନେ ରିଆଦ୍ରୁ ତା’ର ଫେରିବା ବାଟକୁ ଚାହିଁ ବସନ୍ତି। ସେ କେତେଥର ବିଦେଶ ଯାଇଛି, ପାସ୍ପୋର୍ଟ ତଦନ୍ତରୁ ଜଣାପଡ଼ିବ। ସେଥିପାଇଁ ପୁଲିସ ପ୍ରସ୍ତୁତି ଚଳାଇଛି। ମାଟ୍ରିମୋନି ସାଇଟ୍ରେ କମ୍ ବୟସର ବିଧବା, ସ୍ବାମୀ ପରିତ୍ୟକ୍ତାଙ୍କୁ ଟାର୍ଗେଟ୍ କରି ବିବାହ କରିବାର ପ୍ରସ୍ତାବ ଦେଉଥିଲା ବିବିଏ ପଢ଼ା ଧୂର୍ତ୍ତ ସତ୍ୟଜିତ୍। ନିଜକୁ ଗୁଇନ୍ଦା ଅଧିକାରୀ, ଦିଲ୍ଲୀ କ୍ରାଇମ୍ବ୍ରାଞ୍ଚ ଅଫିସର, ସିବିଆଇ ଅଫିସର ଭଳି ପଦବିରେ ଥିବା ଦର୍ଶାଇବା ସହ ସ୍ତ୍ରୀଙ୍କୁ ଛାଡ଼ପତ୍ର ଦେଇସାରିଛି ବୋଲି କହିଥାଏ।
ଏମିତିରେ ସେ ଓଡ଼ିଆ ଓ ଅଣଓଡ଼ିଆ ୫ଜଣ ମହିଳାଙ୍କୁ ବିବାହ କରିସାରିଥିଲା। ଏହାପରେ ବି ଆହୁରି ୪୯ ମହିଳାଙ୍କ ସହ ସେ ଯୋଗାଯୋଗରେ ଥିଲା। କୌଣସି ସୂତ୍ରରୁ ଧୂର୍ତ୍ତ ସତ୍ୟଜିତ୍ର କାରନାମା ୨ ମହିଳାଙ୍କ ନଜରକୁ ଆସିଯାଇଥିଲା। ସେମାନଙ୍କ ମଧ୍ୟରୁ ଜଣେ ବାଲେନୋ କାର୍ ସହିତ ୨୮ ଲକ୍ଷ ଟଙ୍କା ଦେଇଥିଲେ। ଅନ୍ୟଜଣକ ବୁଲେଟ୍ ସହିତ ୮ ଲକ୍ଷ ୬୦ ହଜାର ଟଙ୍କା ଗଣିଦେଇଥିଲେ। ସେମାନେ ଅଭିଯୋଗ କରିବା ପରେ ତାକୁ ଗିରଫ କରାଯାଇଛି।
More Stories
ଓଡିଶା ସୀମାକୁ ଘେରିଛନ୍ତି 2000 ନକ୍ସଲ୍
ରାସନ୍ କାର୍ଡ ପାଇଁ ପୁଣି ଥରେ ଭରିବାକୁ ପଡିବ ଆପ୍ଲିକେସନ୍
ଠିକ୍ ଭାବରେ କାମ କରୁନି ଆୟୁଷମାନ ଭାରତ କାର୍ଡ, ହନ୍ତସନ୍ତ ଜନତା