MYTHOLOGICAL STORY OF DHARMARAJ YUDHISHTIR

ଶ୍ରେଷ୍ଠ ଦାନ
ମହାଭାରତ ଯୁଦ୍ଧ ପରେ ଧର୍ମରାଜ ଯୁଧିଷ୍ଠିର ଅଶ୍ଵମେଧ ଯଜ୍ଞର ଆୟୋଜନ କଲେ। ବ୍ରାହ୍ମଣମାନଙ୍କୁ ଦାନ ଦକ୍ଷିଣା ଓ ଦରିଦ୍ର ଲୋକମାନଙ୍କୁ ଧନ, ବସ୍ତ୍ର, ଭୋଜନରେ ପରିତୃପ୍ତ କଲେ। ଯଜ୍ଞ ଚାଳିଥିବା ସମୟରେ ଗୋଟିଏ ନେଉଳ ଆସି ଧର୍ମରାଜଙ୍କୁ କହିଲେ, ଆପଣଙ୍କର ଏହି ଯଜ୍ଞ କୁରୁକ୍ଷେତ୍ରରେ ଥିବା ଏକ ଦରିଦ୍ର ବ୍ରାହ୍ମଣଙ୍କ ଛତୁଆ ସହିତ ତୁଳନୀୟ ନୁହେଁ । ଏକଥା ଶୁଣି ବ୍ରାହ୍ମଣ ଓ ରାଜାଗଣ ଆଶ୍ଚର୍ଯ୍ୟ ହୋଇ ନେଉଳକୁ କହିଲେ, ତୁମେ କାହିଁକି ଯଜ୍ଞର ନିନ୍ଦା କରୁଛ? ଏହାର ଉତ୍ତରରେ ନେଉଳ କହିଲା:- ଦରିଦ୍ର ବ୍ରାହ୍ମଣ ଜଣକ ଅତିଥି ପରାୟଣ, ତପସ୍ୱୀ । ଶସ୍ୟ ଉତ୍ପାଦନ ପରେ କ୍ଷେତରେ ପଡିଥିବା ଗହମ ଓ ଯଵ ସଂଗ୍ରହ କରି ପରିବାର ପ୍ରତିପୋଷଣ କରନ୍ତି। କିନ୍ତୁ ଏକଦା ଦୁର୍ଭିକ୍ଷ ପଡିଲା ।

ବ୍ରାହ୍ମଣ ସେଥିରୁ କିଛି ଅଳ୍ପ ଶସ୍ୟ ସଂଗ୍ରହ କରି ପାରିଲେ । ତାକୁ ଗୁଣ୍ଡ କରି ଛତୁଆ ପ୍ରସ୍ତୁତ କଲେ ଏବଂ ଭୋଜନରେ ବସିବା ବେଳେ ଜଣେ ଅତିଥି ପହଞ୍ଚିବାରୁ ସେ ଅର୍ଦ୍ଧେକ ଭୋଜନ ଅତିଥିଙ୍କୁ ଦେଇଦେଲେ । କିନ୍ତୁ ସେଥିରେ ଅତିଥିଙ୍କ କ୍ଷୁଧା ନିବାରଣ ନ ହେବାରୁ ବାକି ଅର୍ଦ୍ଧେକ ମଧ୍ୟ ଖାଇବାକୁ ଦେଲେ। ଅତିଥି ତୃପ୍ତ ହୋଇ ବ୍ରାହ୍ମଣଙ୍କୁ କହିଲେ, ହେ ବ୍ରାହ୍ମଣ ମୁଁ ଧର୍ମ ଦେବତା’ମୁଁ ତୁମକୁ ପରୀକ୍ଷା କରୁଥିଲି । ଦୁର୍ଭିକ୍ଷ ସମୟରେ ତୁମେ ନିଜର ତଥା ପରିବାରର ସମସ୍ତ ଖାଦ୍ୟ ଅତିଥିଙ୍କୁ ଦେଲ । ତୁମର ଦାନ ଶ୍ରେଷ୍ଠ ଦାନ । ଅଶ୍ଵମେଧ ଯଜ୍ଞ କଲେ ଯେତିକି ସୁଫଳ ମିଳେ ଏହା ସେତିକି ସୁଖଫଳର ଅଧିକାରୀ ।

ଏ ଦେଖ ଆଗରେ ବିମାନ ଅଛି ସପରିବାର ବସି ବ୍ରହ୍ମଲୋକ ଯାତ୍ରା କର। ବ୍ରାହ୍ମଣ ବ୍ରହ୍ମଲୋକ ଗଲାପରେ ମୁଁ ଗାତରୁ ବାହାରି, ଧର୍ମ ଦେବତା ଭୋଜନ କରି ଅଇଁଠା ହାତ ଧୋଇଥିବା ସେଇ ଜଳରେ ଗଡିଗଲି । ଆଉ ସେଥିରେ ମୋର ଅର୍ଦ୍ଧେକ ଶରୀର ସୁବର୍ଣ୍ଣ ହୋଇଗଲା। ସେହି ଦିନ ଠାରୁ ଅନେକ ଯଜ୍ଞରେ ଅଇଁଠା ଜଳରେ ଗଡିଛି । ହେଲେ ମୋର ଆଉ ଅର୍ଦ୍ଧେକ ଶରୀର ସୁବର୍ଣ୍ଣ ହେଉନାହିଁ । ଆଉ ଆଜି ଶୁଣିଲି ଧର୍ମ ରାଜ ଯୁଧିଷ୍ଠିର ଯଜ୍ଞ କରୁଛନ୍ତି। ମୋର ବାକି ଅର୍ଦ୍ଧେକ ଶରୀର ସୁବର୍ଣ୍ଣ ହେବା ଆଶାରେ ମୁଁ ଅଇଁଠା ଜଳରେ ଗଡିଲି ମାତ୍ର ମୋ ଶରୀର ସୁବର୍ଣ୍ଣ ହେଲା ନାହିଁ । ତେଣୁ ମୁଁ କହିଲି ଏ ଯଜ୍ଞ ଛତୁଆ ସହ ତୁଳନୀୟ ନୁହେଁ । ଏହା କହି ନେଉଳ ସେଠାରୁ ଚାଲିଗଲା । ତେବେ ଏପରି ଭାବରେ ସାମାନ୍ୟ ବ୍ରାହ୍ମଣଟିଏ ମଧ୍ୟ ଧର୍ମରାଜ ଯୁଧିଷ୍ଠିରଙ୍କ ଦାନ ଅପେକ୍ଷା ମହତ୍ୱ ହେଲା ।