ଆସନ୍ତାକାଲି ଗୀତା ମେହେଟ୍ଟାଙ୍କ ଶେଷକୃତ୍ୟ

ପ୍ରଖ୍ୟାତ ଲେଖିକା ତଥା ଭଉଣୀ ଗୀତା ମେହେଟ୍ଟାଙ୍କ ଶେଷ ଦର୍ଶନ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଶନିବାର ରାତିରେ ଗୀତାଙ୍କ ବିୟୋଗ ହେବା ପରେ ନୂଆଦିଲ୍ଲୀ ଗସ୍ତ କରିଥିଲେ ନବୀନ । ଆଜି ସନ୍ଧ୍ୟାରେ ଗୀତାଙ୍କ ପୁଅ ଆମେରିକାରୁ ଆସିବା ପରେ ଆସନ୍ତା କାଲି ଗୀତାଙ୍କ ଶେଷକୃତ୍ୟ ସମ୍ପନ୍ନ ହେବ ବୋଲି ସୂଚନା ମିଳିଛି । ଶନିବାର ରାତିରେ ନୂଆଦିଲ୍ଲୀସ୍ଥିତ ବାସଭବନରେ ୮୦ ବର୍ଷ ବୟସରେ ଶେଷ ନିଶ୍ୱାସ ତ୍ୟାଗ କରିଥିଲେ ଗୀତା । ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ କନ୍ୟା ତଥା ମୁଖ୍ୟମନ୍ତ୍ରୀ ନବୀନ ପଚ୍ଚନାୟକଙ୍କ ବଡ଼ ଭଉଣୀ ଥିଲେ ଗୀତା ମେହେଟ୍ଟା । ୧୯୪୩ରେ ବିଜୁ ପଟ୍ଟନାୟକ ଓ ଜ୍ଞାନ ଦେବୀଙ୍କ କୋଳ ମଣ୍ଡନ କରିଥିଲେ ଗୀତା । ଗୀତା ଭାରତ ଓ ବ୍ରିଟେନରେ ଶିକ୍ଷା ଲାଭ କରିଥିଲେ । ବିଶିଷ୍ଟ ପ୍ରକାଶକ ସନି ମେହେଟ୍ଟାଙ୍କ ସହ ଗୀତାଙ୍କର ବିବାହ ହୋଇଥିଲା । ଗୀତା ମେହେଟ୍ଟାଙ୍କ ବିୟୋଗ କେବଳ ଓଡ଼ିଶା ନୁହେଁ, ସାରା ଦେଶ ଓ ବିଶ୍ବ ଲାଗି ଅପୂରଣୀୟ କ୍ଷତି । ବୃତ୍ତଚିତ୍ର ନିର୍ମାତା, ସାମ୍ବାଦିକା ଭାବେ ବି ବେଶ୍ ଖ୍ୟାତି ଅର୍ଜନ କରିଥିଲେ ଗୀତା । ନିଜର ଯଶସ୍ବୀ ସାଧନା, ଅଙ୍ଗୀକାର, ଲେଖକୀୟ ମହାନୁଭବତାକୁ ପାଥେୟ କରି ସେ ସମୃଦ୍ଧ କରିଥିଲେ ସାହିତ୍ୟ ଭଣ୍ଡାର । ନିଜ ଗରିମା ବଳରେ ସେ ସୃଷ୍ଟି କରିଥିଲେ ନିଜର ସ୍ବତନ୍ତ୍ର ପରିଚୟ ।