ବଦଳିବ ମାଓ ଅଧ୍ୟୁଷିତ କୋରାପୁଟ ଜିଲ୍ଲା ଆଦିବାସୀଙ୍କ ଭାଗ୍ୟ

ବଦଳିବ ମାଓ ଅଧ୍ୟୁଷିତ କୋରାପୁଟ ଜିଲ୍ଲା ଆଦିବାସୀଙ୍କ ଭାଗ୍ୟ । ରାଜସ୍ଥାନରେ ଚାଷ ହେଉଥିବା ମସଲା ମଧ୍ୟ କୋରାପୁଟରେ ଚାଷ ହେବ । ଏହି ସବୁ ମସଲା ମଧ୍ୟରେ ରହିଛି ଜିରା, ପାନମଧୁରି, ଧନିଆ, ଜୁଆଣୀ, କଳାଜିରା ଓ ମେଥି ଇତ୍ୟାଦି । ଭାରତୀୟ କୃଷି ଗବେଷଣା ପରିଷଦ- ମସଲାବୀଜ ଜାତୀୟ ଗବେଷଣା କେନ୍ଦ୍ର ଆଜମେରର ନିର୍ଦ୍ଦେଶକ ଶୈଳେନ୍ଦ୍ରନାଥ ସାକ୍‌ସେନା ଏନେଇ ସୂଚନା ଦେଇଛନ୍ତି । ଆଇସିଏଆର୍‌-ଏନ୍‌ଆର୍‌ସିଏସ୍‌ଏସ୍‌ ଆଜମେର ଦ୍ବାରା ଗତ ବର୍ଷ ଅକ୍ଟୋବରରେ ଏ ନେଇ ଓଡ଼ିଶା ସରକାରଙ୍କ ଠାରୁ ପ୍ରସ୍ତାବ ମଗାଯାଇଥିଲା । ମସଲା ଚାଷ ପାଇଁ ଚଳିତ ମାସ ୨୧ରେ ଜିଲ୍ଲା ପ୍ରଶାସନ ପକ୍ଷରୁ ୬୦.୮୨ ଲକ୍ଷ ଟଙ୍କା ମଂଜୁର ହୋଇଛି। ତିନି ବର୍ଷ ପର୍ଯ୍ୟନ୍ତ ଏହି ପ୍ରକଳ୍ପ କୋରାପୁଟରେ ଜାରି ରହିବ। ଓଡ଼ିଶା ସରକାର ପାଣ୍ଠି ପ୍ରଦାନ କରିବା ପରେ ଆସନ୍ତା ଅକ୍ଟୋବର -ନଭେମ୍ବରରେ ଆଜମେର କେନ୍ଦ୍ରର ୩ ଜଣ ବୈଜ୍ଞାନିକ କୋରାପୁଟ ଗସ୍ତ କରିବେ। ଡଃ ସାକସେନାଙ୍କ ସୂଚନା ହେଲା ହେକ୍ଟର ପିଛା ଚାଷୀମାନେ ୧୦ କୁଇଣ୍ଟାଲ ପର୍ଯ୍ୟନ୍ତ ମସଲା ଉତ୍ପାଦନ କରିପାରିବେ। ଏହା ଦ୍ବାରା ସ୍ଥାନୀୟ ଚାଷୀମାନେ ଅଧିକ ରୋଜଗାର କରିପାରିବେ ବୋଲି ସେ କହିଛନ୍ତି ।