ରବିବାରଠାରୁ ଚୀନ କମ୍ୟୁନିଷ୍ଟ ପାର୍ଟିର ଜାତୀୟ କଂଗ୍ରେସ

ରବିବାରଠାରୁ ଚୀନ କମ୍ୟୁନିଷ୍ଟ ପାର୍ଟିର ଜାତୀୟ କଂଗ୍ରେସ । ଚୀନର ରାଜଧାନୀ ବେଜିଂରେ ଆରମ୍ଭ ହେବ ଚୀନ କମ୍ୟୁନିଷ୍ଟ ପାର୍ଟିର ୨୦ତମ ଜାତୀୟ କଂଗ୍ରେସ । ଏହା ଆସନ୍ତା ୨୨ ତାରିଖ ପର୍ଯ୍ୟନ୍ତ ଚାଲିବ । ଏହି ସମ୍ମିଳନୀ ଅବସରରେ ଚୀନର ନୂଆ ନେତାମାନଙ୍କ ସଂପର୍କରେ ଘୋଷଣା ହେବ । ରାଷ୍ଟ୍ରପତି ସି ଜିନପିଙ୍ଗ୍ ପୁଣି ଥରେ କମ୍ୟୁନିଷ୍ଟ ପାର୍ଟିର ମହାସଚିବ ପଦ ଗ୍ରହଣ କରିବା ନିଶ୍ଚିତ ବୋଲି କୁହାଯାଉଛି । ଏପରି ହେଲେ ସେ କ୍ରମାଗତ ୩ୟ ଥର ପାଇଁ ଚୀନର ରାଷ୍ଟ୍ରପତି ହେବେ । ଚୀନ କମ୍ୟୁନିଷ୍ଟ ପାର୍ଟିର ମହାସଚିବ ପଦ ଚୀନର ସବୁଠାରୁ କ୍ଷମତାଶାଳୀ ପଦ ଭାବେ ଜଣାଶୁଣା । ଏହି ପଦରେ ଆସୀନ ଥିବା ବ୍ୟକ୍ତି ଚୀନ ରାଷ୍ଟ୍ରପତି ପଦ ଗ୍ରହଣ କରିଥାନ୍ତି । ପୁଣି ଥରେ ମହାସଚିବ ଓ ରାଷ୍ଟ୍ରପତି ହେବା ପରେ ସି ଜିନପିଙ୍ଗ୍ ଚୀନ କମ୍ୟୁନିଷ୍ଟ ପାର୍ଟି ଓ ଦେଶର କ୍ଷମତା ଉପରେ ନିଜର ନିୟନ୍ତ୍ରଣକୁ ଆହୁରି ସୁଦୃଢ କରିବାର ସମ୍ଭାବନା ରହିଛି । ଏହାଦ୍ବାରା ଚୀନର ପ୍ରତିଷ୍ଠାତା ମାଓ ସେ ତୁଙ୍ଗଙ୍କ ପରେ ସେ ଚୀନର ୨ୟ ସବୁଠାରୁ ପ୍ରଭାବଶାଳୀ ନେତାରେ ପରିଣତ ହେବେ ।