ସ୍ବରାଷ୍ଟ୍ର ମନ୍ତ୍ରାଳୟ ପ୍ରସ୍ତାବକୁ ଗ୍ରହଣ କଲେ କେନ୍ଦ୍ର ସରକାର

ସ୍ବରାଷ୍ଟ୍ର ମନ୍ତ୍ରାଳୟ ପ୍ରସ୍ତାବକୁ ଗ୍ରହଣ କଲେ କେନ୍ଦ୍ର ସରକାର । ନକ୍ସଲମୁକ୍ତ ଇଲାକାରେ ଜାରିରହିବ ତଦାରଖ । ଓଡ଼ିଶା ସମେତ ଦେଶର ୯ଟି ରାଜ୍ୟର ନକସଲ୍ ମୁକ୍ତ ଇଲାକାରେ ସୁରକ୍ଷା ବାହିନୀ ସତର୍କତା ଓ ତଦାରଖ କାର୍ଯ୍ୟ ଜାରିରଖିବ । ଯେଉଁ ସବୁ ଅଞ୍ଚଳ ନକ୍‌ସଲମୁକ୍ତ ହୋଇଛି, ତା’ର ସ୍ଥାୟିତ୍ବକୁ ନେଇ ସରକାର ଏବେ ବି ଚିନ୍ତାରେ । ଉକ୍ତ ଅଞ୍ଚଳଗୁଡ଼ିକରେ ତଦାରଖ କାର୍ଯ୍ୟ ଜାରି ରଖିବା ଏବଂ ପର୍ଯ୍ୟାପ୍ତ ପାଣ୍ଠି ବ୍ୟବସ୍ଥାକୁ କାଏମ ରଖିବା ପାଇଁ କେନ୍ଦ୍ର ସ୍ବରାଷ୍ଟ୍ର ମନ୍ତ୍ରାଳୟ କମିଟି ଦ୍ବାରା ଦିଆଯାଇଥିବା ପ୍ରସ୍ତାବକୁ କେନ୍ଦ୍ର ସରକାର ଗ୍ରହଣ କରିଛନ୍ତି । ଦେଶର ଆଭ୍ୟନ୍ତରୀଣ ସୁରକ୍ଷାରେ ମାଓବାଦୀଙ୍କ ପଟୁ ଏବେ ବି ବିପଦ ବଳବତ୍ତର ରହିଛି । ଗୁଇନ୍ଦା ସୂତ୍ରରୁ ମିଳିଥିବା ସୂଚନା ଅନୁସାରେ ଯଦି ନକ୍‌ସଲ ମୁକ୍ତ ଇଲାକାରେ ତଦାରଖ ଓ ପାଣ୍ଠି ଆବଣ୍ଟନରେ ହାଲ୍‌କା ମନୋଭବ ପୋଷଣା କରାଯାଏ, ଏହାର ଫାଇଦା ନକ୍‌ସଲମାନେ ଉଠାଇ ପାରନ୍ତି ଓ ପୁନଃ ଏକତ୍ର ହୋଇପାରନ୍ତି । ସ୍ବରାଷ୍ଟ୍ର ମନ୍ତ୍ରାଳୟ ପକ୍ଷରୁ କୁହାଯାଇଛି, ନକ୍‌ସଲମାନଙ୍କ କବଳରୁ ଯେଉଁ ସବୁ ଅଞ୍ଚଳଗୁଡ଼ିକୁ ମୁକ୍ତ କରାଯାଇଛି ସେସବୁ ଅଞ୍ଚଳରେ ବିକାଶ ଉପରେ ଦୃଷ୍ଟି ଦିଆଯିବା ସହିତ ସୁରକ୍ଷା ବାହିନୀର ପର୍ଯ୍ୟାପ୍ତ ମୁତୟନ ବ୍ୟବସ୍ଥାକୁ ଦୀର୍ଘକାଳୀନ କରାଯାଉ ।