ଜାନୁଆରୀରେ ସୋଆ ପକ୍ଷରୁ ହେବ ଆନ୍ତର୍ଜାତିକ ଚେସ୍ ଉତ୍ସବ

ଶିକ୍ଷା ଓ ଅନୁସନ୍ଧାନ ପକ୍ଷରୁ ଆସନ୍ତା ଜାନୁଆରୀ ୨୮ ରୁ ଫେବୃଆରୀ ୪, ୨୦୨୪ ପର୍ଯ୍ୟନ୍ତ ପ୍ରଥମ ସୋଆ ଆନ୍ତର୍ଜାତିକ ଗ୍ରାଣ୍ଡ ମାଷ୍ଟର୍ସ ଚେସ୍ ଉତ୍ସବ ଭୁବନେଶ୍ୱର ସ୍ଥିତ ବିଶ୍ୱବିଦ୍ୟାଳୟ କ୍ୟାମ୍ପସରେ ଆୟୋଜିତ ହେବ । ସୋଆ, ଇନ୍‌ଟରନ୍ୟାସ୍‌ନାଲ ଚେସ ଫେଡେରେସନ୍, ଅଲ୍ ଇଣ୍ଡିଆ ଚେସ୍ ଫେଡେରେସନ୍, ସ୍ପୋର୍ଟ୍ସ ଅଥରିଟି ଅଫ୍ ଇଣ୍ଡିଆ ଓ ଓଡ଼ିଶା ସରକାରଙ୍କ ମିଳିତ  ସହଯୋଗରେ ଅଲ୍ ଓଡ଼ିଶା ଚେସ୍ ଆସୋସିଏସନ୍ ପକ୍ଷରୁ  ଏହି ଟୁର୍ଣ୍ଣାମେଂଟର ଆୟୋଜନ କରାଯାଇଥିବା ବେଳେ ଏଥିରେ ମୋଟ ପୁରସ୍କାର ରାଶି ୩୫ ଲକ୍ଷ ଟଙ୍କା ରଖାଯାଇଛି । ସୋଆର ଦ୍ୱିତୀୟ କ୍ୟାମ୍ପସ୍‌ରେ ଆୟୋଜିତ ହେବାକୁ ଥିବା ଏହି ୮ ଦିନିଆ ଟୁର୍ଣ୍ଣାମେଂଟରେ ୧୮ ରୁ ୨୦ ଟି ଦେଶରୁ ପ୍ରାୟ ୧୫୦୦ ଖେଳାଳୀ ଯୋଗ ଦେବାର ସମ୍ଭାବନା ଅଛି ବୋଲି ବୁଧବାର ଆୟୋଜିତ ସାମ୍ବାଦିକ ସମ୍ମିଳନୀରେ ବିଶ୍ୱବିଦ୍ୟାଳୟର କୁଳପତି ପ୍ରଫେସର ପ୍ରଦୀପ୍ତ କୁମାର ନନ୍ଦ ସୂଚନା ଦେଇଛନ୍ତି । ସାମ୍ବାଦିକ ସମ୍ମିଳନୀରେ ଅଲ୍ ଓଡ଼ିଶା ଚେସ୍ ଆସୋସିଏସନ୍ (ଏଓସିଏ)ର ଉପସଭାପତି ଶ୍ରୀ ବସନ୍ତ କୁମାର ଦାସ, ସମ୍ପାଦକ ଶ୍ରୀ ଦେବବ୍ରତ ଭଟ୍ଟ ଓ ସୋଆର ଛାତ୍ର ମଙ୍ଗଳ ଡିନ୍ ପ୍ରଫେସର ଜ୍ୟୋତି ରଞ୍ଜନ ଦାସ ଉପସ୍ଥିତ ଥିଲେ ।

ଆୟୋଜିତ ସାମ୍ବାଦିକ ସମ୍ମିଳନୀରେ ଶ୍ରୀ ଭଟ୍ଟ କହିଥିଲେ ଯେ ଏହି କାର୍ଯ୍ୟକ୍ରମକୁ ସୋଆ ଯେଉଁଭଳି ଭାବେ ଆଗେଇ ଆସି ସହଯୋଗ କରିଛି ସେଥିପାଇଁ ବିଶ୍ୱବିଦ୍ୟାଳୟ ଉଚ୍ଚ ପ୍ରଶଂସାଯୋଗ୍ୟ । ଚେସ୍‌କୁ ଲୋକପ୍ରିୟ କରିବା ଦିଗରେ ଏହା ଖୁବ୍ ଭଲ କାର୍ଯ୍ୟ କରିବ । ଭାରତ ସମେତ ୨୦ଟି ବିଭିନ୍ନ ଦେଶରୁ ପ୍ରାୟ ୬୦ ରୁ ୭୦ ଜଣ ଗ୍ରାଣ୍ଡ ମାଷ୍ଟର୍ସ ଓ ଇନ୍‌ଟରନ୍ୟାସ୍‌ନାଲ୍ ମାଷ୍ଟର୍ସ ଏହି ପ୍ରତିଯୋଗିତାରେ ସାମିଲ ହେବେ । ପ୍ରତିଯୋଗିତା ନିମନ୍ତେ ରାଜ୍ୟରେ ସର୍ବାଧିକ ପୁରସ୍କାର ରାଶି ପ୍ରଦାନ କରାଯିବ । ଖେଳାଳୀମାନେ ୩ ଟି କ୍ୟାଟେଗୋରୀରେ ବିଭକ୍ତ ହେବେ । କ୍ୟାଟେଗୋରୀ – ଏ, କ୍ୟାଟେଗୋରୀ – ବି ଓ କ୍ୟାଟେଗୋରୀ-ସି । କ୍ୟାଟେଗୋରୀ- ଏ ନିମନ୍ତେ ୨୦ ଲକ୍ଷ ଟଙ୍କାର ମୋଟ ପୁରସ୍କାର ରାଶି ଧାର୍ଯ୍ୟ କରାଯାଇଥିବା ବେଳେ କ୍ୟାଟେଗୋରୀ – ବି ଓ ସି ପାଇଁ ସାଢ଼େ ୭ ଲକ୍ଷ ଟଙ୍କା ମୋଟ ପୁରସ୍କାର ରାଶି ଧାର୍ଯ୍ୟ କରାଯାଇଛି ବୋଲି ଶ୍ରୀ ଭଟ୍ଟ କହିଛନ୍ତି ।