ଯୋଶୀମଠ ପରେ ଆଲିଗଡ଼ରେ ଆତଙ୍କ

ଉତ୍ତରାଖଣ୍ଡର ଯୋଶୀମଠ ପରେ ଉତ୍ତରପ୍ରଦେଶର ଆଲିଗଡ଼ରେ ଆତଙ୍କ । ଏଠାରେ ମଧ୍ୟ କୋଠା ଓ ରାସ୍ତା ଫାଟୁଥିବାରୁ ଆତଙ୍କ ଖେଳି ଯାଇଛି । ଆଲିଗଡ଼ରେ କିଛି ଘରେ ବିଶାଳକାୟ ଫାଟ ସବୁ ଦେଖା ଦେଇଛି । କନୱରିଗଞ୍ଜ ଅଞ୍ଚଳରେ ଗୋଟିଏ ପରେ ଗୋଟିଏ ଘର ଫାଟିଚାଲିଛି । ଉକ୍ତ ଅଞ୍ଚଳର ଜଣେ ବାସିନ୍ଦା କହିଛନ୍ତି, ଗତ କିଛି ଦିନ ଧରି ସେମାନଙ୍କ ଘରେ ଏହି ଫାଟ ‌ଦେଖା ଦେଇଛି । ସେମାନେ ଅତ୍ୟନ୍ତ ‌ଭୟରେ ରହିଛନ୍ତି । ପୌର ନିଗମ କର୍ତ୍ତୃପକ୍ଷଙ୍କୁ ଏନେଇ ଅଭିଯୋଗ କରିଥିଲେ ସୁଦ୍ଧା ଏଦିଗରେ କୌଣସି ପଦ‌କ୍ଷେପ ଗ୍ରହଣ ହୋଇନି । ତେବେ ଆଲିଗଡ଼ ସହରର ୨୦ରୁ ଅଧିକ ଅଞ୍ଚଳରେ ଫାଟ ଏକ ବଡ଼ ବିପଦର ସଙ୍କେତ ବୋଲି କୁହାଯାଉଛି । ସରକାରଙ୍କ ସ୍ମାର୍ଟ ସିଟି କାର୍ଯ୍ୟକ୍ରମ ଅନ୍ତର୍ଗତ କେତେକ ପାଇପ୍‌ଲାଇନ୍‌ ମଧ୍ୟ ଫାଟିଯାଇଛି । ସେପଟେ ପ୍ରଭାବିତ ପରିବାରଗୁଡ଼ିକ ଆବଶ୍ୟକ ସତର୍କତା ଅବଲମ୍ବନ କରିବାକୁ ପ୍ରଶାସନ ପରାମର୍ଶ ଦେଇଛି ।