ବିଜେପିରେ ବିଲୀନ ହୋଇଯିବ ପଞ୍ଜାବ ଲୋକ କଂଗ୍ରେସ

ଆଜି ପଦ୍ମ ଧରିବେ କ୍ୟାପଟେନ ଅମରିନ୍ଦର ସିଂ । ପଞ୍ଜାବର ପୂର୍ବତନ ମୁଖ୍ୟମନ୍ତ୍ରୀ ତଥା ପୂର୍ବତନ କଂଗ୍ରେସ ନେତା କ୍ୟାପଟେନ ଅମରିନ୍ଦର ସିଂ ଆଜି ବିଜେପିରେ ସାମିଲ ହେବେ । ଦିଲ୍ଲୀରେ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେ.ପି ନଡ୍ଡାଙ୍କ ଉପସ୍ଥିତିରେ ସେ ବିଜେପିରେ ସାମିଲ ହେବେ । ତେବେ ତାଙ୍କ ସହ ୭ ଜଣ ବିଧାୟକ ଓ ଜଣେ ପୂର୍ବତନ ଏମପି ମଧ୍ୟ ବିଜେପିରେ ସାମିଲ ହେବେ । ଲଣ୍ଡନରୁ ସ୍ପାଇନାଲ ସର୍ଜରୀ କରି ଫେରିବା ପରେ ଦିଲ୍ଲୀରେ ପ୍ରଧାନମନ୍ତ୍ରୀ ଓ କେନ୍ଦ୍ର ଗୃହମନ୍ତ୍ରୀଙ୍କୁ ଭେଟିଥିଲେ କ୍ୟାପଟେନ୍ । ୨୦୨୧ ସେପ୍ଟେମ୍ବରରେ କ୍ୟାପଟେନଙ୍କୁ ମୁଖ୍ୟମନ୍ତ୍ରୀ ପଦରୁ ହଟାଇ ଚରଣଜିତ ସିଂ ଚନ୍ନିଙ୍କୁ ମୁଖ୍ୟମନ୍ତ୍ରୀ କରିଥିଲା କଂଗ୍ରେସ । ପଞ୍ଜାବ ମୁଖ୍ୟମନ୍ତ୍ରୀ ପଦରୁ ହଟିବା ପରେ ପଞ୍ଜାବ ଲୋକ କଂଗ୍ରେସ ନାମରେ ଦଳ ଗଢ଼ିଥିଲେ କ୍ୟାପଟେନ । ଯାହାକି ସମ୍ପୂର୍ଣ୍ଣ ଭାବେ ବିଜେପିରେ ବିଲୀନ ହୋଇଯିବ । ତେବେ ରାଜନୈତିକ ଭବିଷ୍ୟତକୁ ଦୃଷ୍ଟିରେ ରଖି ସେ ଏଭଳି ନିଷ୍ପତ୍ତି ନେଇଛନ୍ତି ।