କଳା ପ୍ରତି ସମର୍ପଣ ଭା‌ବ ହିଁ ବାଗ୍‌ଦେବୀଙ୍କ ପାଇଁ ମହାର୍ଘ୍ୟ

ଆଉ ଦିନ କେଇଟା ପରେ ଶ୍ରୀପଞ୍ଚମୀ । ଅଧିଷ୍ଠିତ ହେବେ ମା’ ବାଗ୍‌ଦେବୀ । ମା’ଙ୍କୁ ପାଛୋଟି ଆଣିବାକୁ ଛାତ୍ରଛାତ୍ରୀ ଓ ସଙ୍ଗୀତ ସାଧକମାନେ ପ୍ରସ୍ତୁତ ହେଲେଣି । ମା’ଙ୍କ ଆଗମନ ପାଇଁ ମୂର୍ତ୍ତିକାରଠାରୁ ଆରମ୍ଭ କରି ଛାତ୍ରଛାତ୍ରୀ, ଫୁଲ ବେପାରୀଙ୍କ ପର୍ଯ୍ୟନ୍ତ ସମସ୍ତେ ନିଜ ନିଜ ସ୍ତରରେ ବ୍ୟସ୍ତ ।
ଗ୍ରାହକଙ୍କ ଚାହିଦା ପୂରଣ ପାଇଁ ମୂର୍ତ୍ତିକାରମାନେ ଦିନରାତି ଏକ କରି ମା’ଙ୍କ ମୂର୍ତ୍ତି ଗଢ଼ୁଛନ୍ତି । ଏଥର ବଡ଼ମୂର୍ତ୍ତି ପାଇଁ ବହୁ ଜାଗାରୁ ବରାଦ ଆସି ଥିବାବେଳେ ୧ ଫୁଟ୍‌ରୁ ଆରମ୍ଭ କରି ୧୦ଫୁଟ୍‌ ଉଚ୍ଚତା ବିଶିଷ୍ଟ ମା’ଙ୍କ ମୂର୍ତ୍ତି ଉପଲବ୍ଧ ହେଉଛି । ଏହାର ଦର ୫୦ଟଙ୍କାରୁ ଆରମ୍ଭ କରି ୫ ହଜାର ଟଙ୍କା ପର୍ଯ୍ୟନ୍ତ ରହିଛି । କୋଲ୍‌କାତାରୁ କାରିଗର ଆସି ମୂର୍ତ୍ତି ଗଢ଼ୁଥିବା ବେଳେ ବାଘୁଆ, ପିପିଲି ଓ ଉତ୍ତରା ଆଦିରୁ ମାଟି ଆଣି ମୂର୍ତ୍ତି ଗଢ଼ା ଯାଉଛି ।
ଧଳା ରଙ୍ଗ ମା’ ସରସ୍ବତୀଙ୍କ ପସନ୍ଦ ହୋଇଥିବାରୁ ରାଜଧାନୀ‌ର ବିଭିନ୍ନ ଫୁଲ ଦୋକାନରେ ଧଳା ସେବତୀ, ଧଳା ଗୋଲାପ, ଶ୍ବେତପଦ୍ମ ଓ ରଜନୀଗନ୍ଧା ଆଦି ଫୁଲରେ ଭର୍ତ୍ତି ହେଲାଣି । ବିଭିନ୍ନ ସ୍କୁଲ, କଲେଜ ପକ୍ଷରୁ ମଧ୍ୟ ପୂଜା ଦିନ ଧଳା ଫୁଲ ପାଇଁ ଆଗୁଆ ବରାଦ ଦିଆ ସରିଛି । ରଜନୀଗନ୍ଧା ଗଜରା ମାଳ ଛୋଟ ୧୫୦ଟଙ୍କା ରହିଥିବା ବେଳେ ବଡ଼ ମାଳ ୨୫୦ଟଙ୍କା ରହିଛି। ସେହିପରି ଧଳା ସେବତୀ ଗୋଟା ୧୦ରୁ ୨୦ ଟଙ୍କା, ଧଳା‌ ଗୋଲାପ ୨୫ଟଙ୍କା ଓ ଶ୍ବେତପଦ୍ମ ଗୋଟା ୩୦ ଟଙ୍କା ରହିଛି। ଏବେ ଚାହିଦା ଥିବାରୁ ଫୁଲ ଦର ମଧ୍ୟ ୫ରୁ ୧୦ ଟଙ୍କା ପର୍ଯ୍ୟନ୍ତ ବୃଦ୍ଧି ପାଇଛି ।
ଛାତ୍ରଛାତ୍ରୀ ଓ କଳା ସାଧକଙ୍କ ପାଇଁ ବସନ୍ତ ପଞ୍ଚମୀର ଗୁରୁତ୍ବ ଅଧିକ । ପାଠପଢ଼ା ଆରମ୍ଭ କରିବାକୁ ଯାଉଥିବା ଓଡ଼ିଆ ଘରର କୁନିକୁନି ପିଲାମାନେ ଏହି ଦିନ ସିଲଟରେ ଖଡ଼ି ଛୁଆଁଇଥା’ନ୍ତି । କଳା ଜଗତ, ବିଶେଷକରି ସଂଗୀତ ସାଧନା କରୁଥିବା ଛାତ୍ରଛାତ୍ରୀମାନେ ମା’ଙ୍କୁ ଆବାହନ କରି ଆଶୀର୍ବାଦ ଭିକ୍ଷା କରିଥା’ନ୍ତି । ବ୍ରହ୍ମପୁତ୍ରୀ ସରସ୍ବତୀ ହେଉଛନ୍ତି ସଙ୍ଗୀତର ଦେବୀ, ବିଦ୍ୟାଦାତ୍ରୀ । ହିନ୍ଦୁ ଧର୍ମରେ ପ୍ରତିଟି ସଙ୍ଗୀତଜ୍ଞ ଏହି ଦିନ ମା’ଙ୍କୁ ଆରାଧନା କରିଥା’ନ୍ତି । କୁନି କୁନି ପିଲାମାନଙ୍କୁ ସିଲଟରେ ଏହି ଦିନ ଆମେ ସା ରେ ଗା ମା… ଲେଖାଇ ମା’ଙ୍କ ଚରଣରେ ଅର୍ପଣ କରିବା ସହ ସଙ୍ଗୀତର ସାତ ସୁର ଶିଖାଇଥାଉ । ସରସ୍ୱତୀ ଅର୍ଥ କଳାର ଅଧିଷ୍ଠାତ୍ରୀ ଦେବୀ । ଏହି ଦିନ କିଛି କଳାକାର ଗୀତ ଗାଇ ମଧ୍ୟ ମା’ଙ୍କୁ ଆରଧନା କରିଥା’ନ୍ତି । କଳା ପ୍ରତି ସମର୍ପଣ ଭା‌ବ ହିଁ ମା’ଙ୍କ ପାଇଁ ମହାର୍ଘ୍ୟ ବୋଲି ବିବେଚନା କରାଯାଏ ।