ମାଟିରେ ମିଶିବ ଦୁଷ୍କର୍ମକାରୀର ଘର

ମଧ୍ୟପ୍ରଦେଶର ଉଜ୍ଜୟିନୀ ଦୁଷ୍କର୍ମ ଘଟଣା ସମଗ୍ର ଦେଶକୁ ଦୋହଲାଇ ଦେଇଛି । ୧୨ ବର୍ଷୀୟା ନାବାଳିକା ଦୁଷ୍କର୍ମର ଶିକାର ହେବାପରେ ଯେଭଳି ଅବସ୍ଥାରେ ସାହାଯ୍ୟ ପାଇଁ ବୁଲୁଥିଲା ଏବଂ ସାହାଯ୍ୟ ନପାଇ ଶେଷରେ ଚେତାଶୂନ୍ୟ ହୋଇ ପଡ଼ିଯାଇଥିଲା ତାହା ସଭ୍ୟ ସମାଜ ପାଇଁ ଅତ୍ୟନ୍ତ ଲଜ୍ଜାଜନକ ଘଟଣା । ତେବେ ସୂଚନା ରହିଛି ଯେ ନାବାଳିକାକୁ ଦୁଷ୍କର୍ମ କରିଥିବା ଅଭିଯୁକ୍ତର ଘର ଆସନ୍ତାକାଲି ଭାଙ୍ଗିଦିଆଯିବ । କାରଣ ଏହା ବେଆଇନ ଭାବେ ନିର୍ମାଣ ହୋଇଥିବା ଅଭିଯୋଗ ହୋଇଛି । ଏହି ମାମଲାରେ ଅଭିଯୁକ୍ତ ଭରତ ସୋନି ନାମକ ଜଣେ ଅଟୋ ରିକ୍ସା ଡ୍ରାଇଭରଙ୍କୁ ଗୁରୁବାର ଗିରଫ କରାଯାଇଥିଲା । ଭରତ ବର୍ତ୍ତମାନ ଜେଲରେ ଅଛି । ତା’ ପରିବାର ବର୍ଷ ବର୍ଷ ଧରି ସରକାରୀ ଜମିରେ ରହୁଛନ୍ତି ବୋଲି ଉଜ୍ଜୟିନୀ ମହାନଗର ନିଗମ କହିଛି । ମହାନଗର କମିସନର ରୋଶନ ସିଂ କହିଛନ୍ତି ଯେ ‘‘ଏହି ଜମି ସରକାରଙ୍କର ଅଟେ । ତେଣୁ ଏହାକୁ ଭାଙ୍ଗିବା ପାଇଁ କୌଣସି ନୋଟିସ୍‌ର ଆବଶ୍ୟକତା ନାହିଁ । ସେପଟେ ଆସନ୍ତାକାଲି ମଧ୍ୟପ୍ରଦେଶ ପୁଲିସର ସହଯୋଗରେ ଏହି ଘରକୁ ଭାଙ୍ଗି ଦିଆଯିବ ।’’