ଦୋଳଯାତ୍ରାର ସାତଘେରା

ଶ୍ରୀଜଗନ୍ନାଥଙ୍କ ରଥଯାତ୍ରା ଯେଉଁପରି ନବଦିନ ଯାତ୍ରା, ତାଙ୍କର ଦୋଳଯାତ୍ରା ସେହିପରି ସପ୍ତଦିନ ଯାତ୍ରା । ଏହା ଫାଲଗୁନ ଶୁକ୍ଳ ଦଶମୀରୁ ଆରମ୍ଭ ହୋଇ ଚୈତ୍ର କୃଷ୍ଣ ପ୍ରତିପଦରେ ଶେଷ ହୁଏ । ଶ୍ରୀଜଗନ୍ନାଥଙ୍କଠାରୁ ଆଜ୍ଞାମାଳ ପାଇ, ଫାଲଗୁନ ଶୁକ୍ଳ ଚତୁର୍ଦ୍ଦଶୀ ଦିନ, ଏହି ଯାତ୍ରାରେ ଶ୍ରୀଦେବୀ, ଭୂଦେବୀ ଓ ଦୋଳଗୋବିନ୍ଦ ବିମାନରେ ବିଜେ ହୋଇ, ସିଂହଦ୍ୱାର ଓ ଲଙ୍ଗୁଳି ମଠ ଦେଇ ଦୋଳବେଦୀଠାରେ ଥିବା ଅଗ୍ନି ଉତ୍ସବ ଗୃହ ନିକଟକୁ ବିଜେ କରନ୍ତି। ବିମାନରେ ଥାଇ ସେମାନେ ଅଗ୍ନି ଉତ୍ସବ ଘରକୁ ସାତଘେରା ବୁଲନ୍ତି । ଫାଲଗୁନ ପୂର୍ଣ୍ଣିମା ବା ଦୋଳପୂର୍ଣ୍ଣିମା ଦିନ ଏହି ସାତଘେରା ବୁଲିବା ଅଧିକ ସ୍ଥାନରେ ହୁଏ । ପ୍ରଥମେ ଏହି ତିନି ଠାକୁର-ଠାକୁରାଣୀ ମହାଜନ ସେବକଙ୍କ ହାତରେ ବିଜେ ହୋଇ ପ୍ରଥମେ ରତ୍ନସିଂହାସନ ଚାରିପଟେ ସାତଘେରା ବୁଲନ୍ତି ।