ସୋସିଆଲ ମିଡିଆରେ ଚର୍ଚ୍ଚାରେ ବ୍ରିଟେନ ପ୍ରଧାନମନ୍ତ୍ରୀ

ଚର୍ଚ୍ଚାରେ ବ୍ରିଟେନ ପ୍ରଧାନମନ୍ତ୍ରୀ ଋଷି ସୁନକ୍ । ତାଙ୍କ ସରଳତା ଓ ମାନବିକତାକୁ ନେଇ ସୋସିଆଲ ମିଡିଆରେ ଚର୍ଚ୍ଚା । ଖାଲି ପାଦରେ ଆଣ୍ଡୁ ମାଡ଼ି, ବାଂଲାଦେଶ ପ୍ରଧାନମନ୍ତ୍ରୀ ଶେଖ୍ ହସିନାକୁ ଭେଟିବା ସହ କଥାବାର୍ତା ହେଉଥିବାର ଫଟୋ ଏବେ ସୋସିଆଲ ମିଡ଼ିଆରେ ଭାଇରାଲ୍ ହେବାରେ ଲାଗିଛି । ଜି-୨୦ ସମ୍ମିଳନୀ ଅବସରରେ ଶେଖ୍ ହସିନାଙ୍କୁ ଭେଟିଥିଲେ ଋଷି ସୁନକ୍ । ଏହି ସମୟରେ ସେ ଅତି ନମ୍ରତା ସହ ବାଂଲାଦେଶରେ ପ୍ରଧାନମନ୍ତ୍ରୀଙ୍କ ସହ କଥାବାର୍ତ୍ତା ହେଉଥିଲେ । ବାଂଲାଦେଶ ପ୍ରଧାନମନ୍ତ୍ରୀ ଚେୟାରରେ ବସିଥିବା ବେଳେ ତଳେ ଆଣ୍ଡୁମାଡ଼ି ତାଙ୍କ ପାଖରେ ବସିଥିଲେ ବ୍ରିଟେନ୍ ପ୍ରଧାନମନ୍ତ୍ରୀ । ବିଶ୍ୱର ଅନ୍ୟତମ ଶକ୍ତିଶାଳୀ ରାଷ୍ଟ୍ରର ମୁଖ୍ୟଙ୍କ ଏହି ନମ୍ରତାକୁ ନେଇ ସୋସିଆଲ ମିଡ଼ିଆରେ ଚର୍ଚ୍ଚା ହେଉଛି । ଜଣେ ସୋସିଆଲ ମିଡ଼ିଆ ୟୁଜର୍ସ ଏହି ଫଟୋକୁ ସେୟାର କରିବା ସହ ଋଷି ସୁନାକଙ୍କୁ ଜଣେ ଭଦ୍ର ବ୍ୟକ୍ତି ବୋଲି ଲେଖିଛନ୍ତି । ଆଉ ଜଣେ ଲେଖିଛନ୍ତି- ଏହି ଫଟୋ ବ୍ରିଟେନ୍ ପ୍ରଧାନମନ୍ତ୍ରୀଙ୍କ ସରଳତାର ପରିଚୟ ।