ସୋନିଆ ଓ ରାହୁଲଙ୍କ ସମ୍ପତ୍ତି ଜବତ କଲା ଇଡି

ନ୍ୟାସନାଲ ହେରାଲ୍ଡ ମନି ଲଣ୍ଡରିଂ ମାମଲାରେ କଂଗ୍ରେସ ନେତ୍ରୀ ସୋନିଆ ଗାନ୍ଧୀ ଓ ରାହୁଲ ଗାନ୍ଧୀଙ୍କ ସମ୍ପତ୍ତିକୁ ଜବତ କରିବା ପାଇଁ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ପ୍ରକ୍ରିୟା ଆରମ୍ଭ କରିଛି। ଏପ୍ରିଲ ୧୧ରେ କେନ୍ଦ୍ରୀୟ ତଦନ୍ତକାରୀ ଏଜେନ୍ସି ଦିଲ୍ଲୀ, ମୁମ୍ବାଇ ଓ ଲକ୍ଷ୍ନୌର ପ୍ରପର୍ଟି ରେଜିଷ୍ଟ୍ରାରମାନଙ୍କୁ ନୋଟିସ ଜାରି କରିଥିଲା, ଯେଉଁଠାରେ ସୋନିଆ ଓ ରାହୁଲ ଗାନ୍ଧୀଙ୍କ ମାଲିକାନାରେ ଥିବା ୟଙ୍ଗ ଇଣ୍ଡିଆନ ଲିମିଟେଡ୍ (ୱାଇଆଇଏଲ୍) ଦ୍ୱାରା ଅଧିଗ୍ରହଣ କରାଯାଇଥିବା ଆସୋସିଏଟେଡ୍ ଜର୍ଣ୍ଣାଲ୍ସ ଲିମିଟେଡ୍ (ଏଜେଏଲ୍)ର ସମ୍ପତ୍ତି ରହିଛି।

ଏକଦା ୱାଇଆଇଏଲ୍ ଦ୍ୱାରା ନ୍ୟାସନାଲ ହେରାଲ୍ଡ ଖବରକାଗଜ ପ୍ରକାଶ କରୁଥିବା ଏଜେଏଲ୍‌କୁ ଅଧିଗ୍ରହଣ କରିବାରେ ଆର୍ଥିକ ଅନିୟମିତତା ଓ ପାଣ୍ଠି ହେରଫେରକୁ ନେଇ ଏହି ମାମଲା ରହିଛି। ପ୍ରାରମ୍ଭିକ ଅଭିଯୋଗ ଆଣିଥିବା ବିଜେପି ନେତା ସୁବ୍ରମଣ୍ୟମ୍ ସ୍ୱାମୀ ଅଭିଯୋଗ କରିଛନ୍ତି ଯେ ୟଙ୍ଗ ଇଣ୍ଡିଆନ ୨୦୦୦ କୋଟି ଟଙ୍କାରୁ ଅଧିକ ମୂଲ୍ୟର ସମ୍ପତ୍ତିକୁ ନିୟନ୍ତ୍ରଣ କରିବା ପାଇଁ ଏଜେଏଲ୍‌ର ସମ୍ପତ୍ତିକୁ ଅନୈତିକ ଉପାୟରେ ଅକ୍ତିଆର କରିଛି। ଇଡି ଅନୁଯାୟୀ, ଏଜେଏଲ୍‌ର ସମ୍ପତ୍ତି ସହ ଜଡିତ ୯୮୮ କୋଟି ଟଙ୍କାର ହେରଫେର ହୋଇଥିବା ତଦନ୍ତରୁ ଜଣାପଡିଛି। ନିକଟରେ ଏକ ବିଚାର କର୍ତ୍ତୃପକ୍ଷ ସମ୍ପତ୍ତିଗୁଡ଼ିକର ଅସ୍ଥାୟୀ ଜବତକୁ ନିଶ୍ଚିତ କରିବା ପରେ ଏହି ପ୍ରକ୍ରିୟା ଆରମ୍ଭ ହୋଇଥିଲା।

୨୦୨୩ ନଭେମ୍ବରରେ ଇଡି ଦିଲ୍ଲୀ, ମୁମ୍ବାଇ ଓ ଲକ୍ଷ୍ନୌରେ ୬୬୧ କୋଟି ଟଙ୍କାର ସ୍ଥାବର ସମ୍ପତ୍ତି ଓ ୯୦.୨ କୋଟି ଟଙ୍କାର ଏଜେଏଲ୍ ସେୟାରକୁ ଅସ୍ଥାୟୀ ଭାବେ ଜବତ କରିଥିଲା। ଏପ୍ରିଲ ୧୦ ତାରିଖରେ ଏହି ସଂପୃକ୍ତି ସମ୍ପର୍କରେ ସୂଚନା ମିଳିଥିଲା। ମୁମ୍ବାଇର ହେରାଲ୍ଡ ହାଉସର ତିନିଟି ମହଲାକୁ ବ୍ୟବହାର କରୁଥିବା ଜିନ୍ଦଲ ସାଉଥ ୱେଷ୍ଟ ପ୍ରୋଜେକ୍ଟକୁ ଅଲଗା ନୋଟିସ ଜାରି କରାଯାଇଛି। ଭବିଷ୍ୟତର ସମସ୍ତ ଭଡ଼ା ଦେୟ ସିଧାସଳଖ ଇଡି ନିକଟରେ ଜମା କରିବାକୁ କମ୍ପାନିକୁ ନିର୍ଦ୍ଦେଶ ଦିଆଯାଇଛି। ଏଜେନ୍ସି ଅଭିଯୋଗ କରିଛି ଯେ କଂଗ୍ରେସ ନେତୃତ୍ୱ  ସହ ଜଡିତ ଏକ ଜଟିଳ ରାଜନୈତିକ-ଆର୍ଥିକ ମେଣ୍ଟ ମାଧ୍ୟମରେ ବେଆଇନ ଭାବେ ସମ୍ପତ୍ତି ଅଧିଗ୍ରହଣ କରାଯାଇଥିଲା।

୨୦୨୧ରେ ଆନୁଷ୍ଠାନିକ ଭାବେ ଆରମ୍ଭ ହୋଇଥିବା ଇଡିର ତଦନ୍ତ ୨୦୧୪ରେ ସୁବ୍ରମଣ୍ୟମ୍ ସ୍ୱାମୀ ଦିଲ୍ଲୀର ଏକ ଅଦାଲତରେ ଦାଖଲ କରିଥିବା ଏକ ବ୍ୟକ୍ତିଗତ ଆପରାଧିକ ଅଭିଯୋଗରୁ ଆରମ୍ଭ ହୋଇଛି। ସୋନିଆ ଗାନ୍ଧୀ, ରାହୁଲ ଗାନ୍ଧୀ ଓ ଅନ୍ୟ ବରିଷ୍ଠ କଂଗ୍ରେସ ନେତାମାନେ ୟଙ୍ଗ୍ ଇଣ୍ଡିଆନ୍ ଜରିଆରେ ଏଜେଏଲ୍‌ର ୨୦୦୦ କୋଟି ଟଙ୍କାରୁ ଅଧିକ ମୂଲ୍ୟର ସମ୍ପତ୍ତିକୁ ୫୦ ଲକ୍ଷ ଟଙ୍କାରେ ହଡ଼ପ କରିଥିବା ଅଭିଯୋଗ ହୋଇଛି।