ସହିଦ ସପ୍ତାହ ପାଇଁ ମାଓବାଦୀଙ୍କ ପ୍ରସ୍ତୁତି

ଆଗକୁ ଆସୁଛି ନକ୍ସଲଙ୍କ ସହିଦ ସପ୍ତାହ । ଏଥିପାଇଁ ପ୍ରସ୍ତୁତି ଆରମ୍ଭ କରିଛନ୍ତି ମାଓବାଦୀ । ନୂଆପଡ଼ା ସୁନାବେଡ଼ା ଅଭୟାରଣ୍ୟରେ ପ୍ରଶିକ୍ଷଣ ନେଉଥିବାବେଳେ ବଡ଼ ଅଘଟଣ ଘଟାଇବାକୁ ପ୍ରସ୍ତୁତି କରୁଥିବା ସୂଚନା । ବେଶ୍ କିଛି ଦିନ ଧରି ନିରବ ଥିବା ନକ୍ସଲଙ୍କ ବନ୍ଧୁକ ଏହି ସମୟରେ ଗର୍ଜିବାକୁ ପ୍ରସ୍ତୁତ ହେଉଛି । ଏଥିପାଇଁ ଯୋଗାଡ଼ ହେଉଛି ଅତ୍ୟାଧୁନିକ ଅସ୍ତ୍ରଶସ୍ତ୍ର । ସୂଚନା ମୁତାବକ, ସୀମାରେ ୪୦୦ ନକ୍ସଲ ଏକଜୁଟ ହୋଇଛନ୍ତି । ନିକଟରେ ଛତିଶଗଡ଼ର ଗରିଆବନ୍ଦ ଜିଲ୍ଲା ମାନପୁର ସହରରେ ବାଇକରେ ଯାଉଥିବା ବେଳେ, ଗିରଫ ୩ ଜଣ ନକ୍ସଲଙ୍କୁ ଜେରା ବେଳେ ପୋଲିସ ଏ ତଥ୍ୟ ହାସଲ କରିଛି । ନୂଆ ହିଂସାର ବ୍ଲୁ ପ୍ରିଣ୍ଟ ପ୍ରସ୍ତୁତ କରିବା ଉଦ୍ଦେଶ୍ୟରେ ନୂଆପଡ଼ା ଜିଲ୍ଲାର ଛତିଶଗଡ଼ ସୀମାକୁ ଲାଗିଥିବା ବୋଡେନ ଥାନା ଭଇଁଷାଦାବୀ ପଞ୍ଚାୟତର ପାଟଦର୍ହା ସଂରକ୍ଷିତ ଜଙ୍ଗଲରେ ଚାଲିଥିବା ମାଓବାଦୀଙ୍କ ପ୍ରଶିକ୍ଷଣ ଶିବିରରେ ଯବାନମାନେ ଚଢାଉ କରିଥିଲେ ।