ସମ୍ପତ୍ତି ତାଲିକା ଘୋଷଣା କରିଛନ୍ତି କେନ୍ଦ୍ର ରେଳ ମନ୍ତ୍ରୀ

ସମ୍ପତ୍ତି ତାଲିକା ଘୋଷଣା କରିଛନ୍ତି କେନ୍ଦ୍ର ରେଳ ମନ୍ତ୍ରୀ ଅଶ୍ବିନୀ ବୈଷ୍ଣବ । ସେ ତାଲିକା ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟରେ ଦାଖଲ କଲା ପରେ ଏହାକୁ ସାର୍ବଜନୀନ କରାଯାଇଛି । ଶ୍ରୀ ବୈଷ୍ଣବଙ୍କ ଦ୍ବାରା ପ୍ରଦତ୍ତ ବିବରଣୀ ଅନୁସାରେ ମାର୍ଚ ୩୧, ୨୦୨୨ ସୁଦ୍ଧା ସେ ଓ ତାଙ୍କ ପତ୍ନୀଙ୍କ ନାମରେ ହରିୟାଣାର ଗୁରୁଗ୍ରାମରେ ଥିବା ଏକ ଫ୍ଲାଟର ମୂଲ୍ୟ ୨ କୋଟି ୧୭ ଲକ୍ଷ ଟଙ୍କା, ଅହମଦାବାଦରେ ଥିବା ଫ୍ଲାଟ୍‌ର ମୂଲ୍ୟ ୪୫ ଲକ୍ଷ ଟଙ୍କା ଓ ଭୁବନେଶ୍ବର ଚନ୍ଦ୍ରଶେଖରପୁର ପ୍ରାଚୀ ଏନ୍‌କ୍ଲେଭ ଜାଗାର ମୂଲ୍ୟ ୬୫ ଲକ୍ଷ ଟଙ୍କା । ତାଙ୍କ ପାଖରେ ନଗଦ ୭ ହଜାର ୭୮୦ ଟଙ୍କା ରହିଥିବା‌ ବେଳେ ୮୦ ଲକ୍ଷ ଟଙ୍କାର ବ୍ୟାଙ୍କ ବାଲାନ୍ସ ରହିଛି । ତାଙ୍କ କାର୍‌ର ମୂଲ୍ୟ ୮ ଲକ୍ଷ ୨ ହଜାର ଟଙ୍କା । ସେହିଭଳି ତାଙ୍କର ଅନ୍‌କୋଟେଡ୍‌ ସିକ୍ୟୁରିଟିଜ୍‌ରେ ୮୮ କୋଟି ୧ ଲକ୍ଷ ୭୫ ହଜାର ଟଙ୍କା ଏବଂ କୋଟେଡ୍‌ ସିକ୍ୟୁରିଟିଜରେ ୮ ଲକ୍ଷ ଟଙ୍କା ରହିଛି । ବ୍ୟାଙ୍କଗୁଡ଼ିକରେ ୯ କୋଟି ୭୩ ଲକ୍ଷ ୩୦ ହଜାର ଟଙ୍କାର ଜମାରାଶି, କର୍ମଚାରୀ ଭବିଷ୍ୟନିଧିରେ ୧ କୋଟି ୪୯ ଲକ୍ଷ ୬୨ ହଜାର ଟଙ୍କା, ଜୀବନ ବୀମାରେ ୧୧ ଲକ୍ଷ ୨୨ ହଜାର ଟଙ୍କା ଏବଂ ଋଣ ଓ ଅଗ୍ରୀମ ବାବଦରେ ୧ କୋଟି ୭୭ ଲକ୍ଷ ଟଙ୍କା ରହିଛି । ଏହା ବାଦ୍‌ ୨୨ ଲକ୍ଷ ଟଙ୍କା ମୂଲ୍ୟର ଅନ୍ୟାନ୍ୟ ସାମଗ୍ରୀ ରହିଥିବା ଶ୍ରୀ ବୈଷ୍ଣବ ଦର୍ଶାଇଛନ୍ତି ।