କେନ୍ଦ୍ର ସରକାରଙ୍କ ଦ୍ୱାରା ଆୟୋଜିତ କାର୍ଯ୍ୟକ୍ରମକୁ ବିଜେପି ନେତାମାନେ ଦଳୀୟ କାର୍ଯ୍ୟକ୍ରମ ଭାବି ଯେପରି ଆଚରଣ ପ୍ରଦର୍ଶନ କରୁଛନ୍ତି, ତାହାକୁ ନେଇ ବିଭିନ୍ନ ମହଲରେ ପ୍ରତିକ୍ରିୟା ସୃଷ୍ଟି ହୋଇଛି । ଏହିପରି ଏକ ଘଟଣାରେ ବିଜେପିର ରାଷ୍ଟ୍ରୀୟ ପ୍ରବକ୍ତା ସମ୍ବିତ୍ ପାତ୍ରଙ୍କୁ ହଟହଟା ହେବାକୁ ପଡ଼ିଛି । ନୟାଗଡ଼ ଜିଲ୍ଲାର ଏକ କାର୍ଯ୍ୟକ୍ରମରେ ସ୍ଥାନୀୟ ଜନସାଧାରଣ ‘ପ୍ରାୟୋଜିତ ନେତା’ ଭାବରେ ଆକ୍ଷେପ କରିବା ସହ ଏକ କାର୍ଯ୍ୟକ୍ରମର ମଞ୍ଚରୁ ତଳକୁ ଓହ୍ଲାଇ ଯିବାକୁ ବାଧ୍ୟ କରିବା ଶ୍ରୀ ପାତ୍ରଙ୍କ ପାଇଁ ଅପମାନଜନକ ପରିସ୍ଥିତି ସୃଷ୍ଟି କରିଛି । ସ୍ଥାନୀୟ ବିଜେପି ନେତାମାନଙ୍କୁ ଉପେକ୍ଷା କରି ସମ୍ବିତଙ୍କୁ ଗୁରୁତ୍ୱ ଦିଆଯାଉଥିବାରୁ ଏପରି ଅବସ୍ଥା ଭୋଗିବାକୁ ପଡ଼ିଲା ବୋଲି କିଛି ବିଜେପି କର୍ମୀଙ୍କ ଟିପ୍ପଣୀ ଦଳ ପାଇଁ କଟା ଘା’ରେ ଚୂନ ମାରିବା ପରି ହୋଇଛି । ଗତ ସପ୍ତାହକ ମଧ୍ୟରେ ତୃତୀୟ ଥର ପାଇଁ ଏପରି ଘଟଣା ସ୍ଥାନୀୟ ଅଞ୍ଚଳରେ ବିଜେପି ଓ ଏହାର ନେତାଙ୍କ ସ୍ଥିତିକୁ ସ୍ପଷ୍ଟ କରି ଦେଇଛି । ରଣପୁର ବ୍ଲକ ଗୋପାଳପୁରଠାରେ ଶୁକ୍ରବାର ଭାରତ ବିକାଶ ସଂକଳ୍ପ ଯାତ୍ରା ପାଇଁ ଏକ ସଭା ଆୟୋଜନ କରାଯାଇଥିଲା । ସଭାରେ ବିଜେପି ନେତ୍ରୀ ସୁରମା ପାଢ଼ୀ ଏବଂ ସମ୍ୱିତ ପାତ୍ର ଉପସ୍ଥିତ ଥିଲେ। ସମ୍ୱିତ ମଞ୍ଚ ଉପରେ ଭାଷଣ ଦେବାକୁ ପ୍ରସ୍ତୁତ ହେଉଥିବା ବେଳେ ସ୍ଥାନୀୟ ଲୋକେ ତାଙ୍କୁ ଜୋରଦାର ବିରୋଧ କରିଥିଲେ । କାହିଁକି ସରକାରୀ କାର୍ଯ୍ୟକ୍ରମରେ ଅଣନିର୍ବାଚିତ ତଥା ବିଜେପି ନେତା ଉପସ୍ଥିତ ରହିବେ ବୋଲି ପ୍ରଶ୍ନ କରିଥିଲେ । ଶହଶହ ଲୋକଙ୍କ ପ୍ରଶ୍ନକୁ ସାମ୍ନା କରି ନପାରି ସମ୍ୱିତ ଚୁପ୍ ହୋଇ ମଞ୍ଚ ତଳକୁ ଓହ୍ଲାଇ ଆସିବାକୁ ବାଧ୍ୟ ହୋଇଥିଲେ । ଏହାକୁ ନେଇ ଅପ୍ରୀତିକର ପରିସ୍ଥିତି ସୃଷ୍ଟି ହେବାରୁ ଶେଷରେ କାର୍ଯ୍ୟକ୍ରମକୁ ବାତିଲ କରି ଦିଆଯାଇଥିଲା । ଅନ୍ୟପକ୍ଷରେ କେନ୍ଦ୍ର ସରକାରଙ୍କ କାର୍ଯ୍ୟକ୍ରମକୁ ନେଇ ବିଜେପି ରାଜନୀତି କରୁଥିବା ସ୍ଥାନୀୟ ଜନସାଧାରଣ ଅଭିଯୋଗ କରିଛନ୍ତି।
More Stories
ଓଡିଶାକୁ ବାତ୍ୟା ଭୟ
ମୋହନ ସରକାରଙ୍କ ଭେଟି, ୬୦୨୫ ଶିକ୍ଷକ ପାଇବେ ନିଯୁକ୍ତି
ବିଜେପିରେ ମିଶିଲେ ମମିତା ମେହେରଙ୍କ ବାପା ମା