ବଢୁଛି ଶ୍ରୀଲଙ୍କାବାସୀଙ୍କ ସଙ୍କଟ

ଭୟଙ୍କର ଆର୍ଥିକ ସଙ୍କଟ ଦେଇ ଗତି କରୁଛି ଶ୍ରୀଲଙ୍କା । ଏଭଳି ସ୍ଥିତିରେ ଶ୍ରୀଲଙ୍କାବାସୀଙ୍କ ଦୁଃଖକୁ ଦ୍ୱିଗୁଣିତ କରିଛି ଜରୁରୀକାଳୀନ ସାମଗ୍ରୀର ଆକାଶଛୁଆଁ ଦର । ଶ୍ରୀଲଙ୍କାରେ ଏବେ ଟମାଟୋ କିଲୋ ୧୫୦ ଟଙ୍କାରେ ପହଞ୍ଚିଥିବା ବେଳେ ମୂଳାର ଦର ୪୯୦ ଟଙ୍କା ଛୁଇଁଛି । ସେହିଭଳି ଭାବେ ପିଆଜ ୨୦୦, ଆଳୁ ୨୨୦ ଟଙ୍କାରେ ବିକ୍ରି ହେଉଛି । ଆଉ ଏହି ସବୁ ପନିପରିବା ଦରବୃଦ୍ଧି ଶ୍ରୀଲଙ୍କାରେ ଖାଦ୍ୟ ସଙ୍କଟ ସୃଷ୍ଟି କରିଛି । ତେବେ କେବଳ ପନିପରିବା ନୁହେଁ ପୂର୍ବରୁ ପେଟ୍ରୋଲ ଓ ଡିଜେଲର ଦରବୃଦ୍ଧି ସାଧାରଣ ଲୋକଙ୍କର ଚିନ୍ତା ବଢାଇଥିବା ବେଳେ ବିଦ୍ୟୁତ୍ ସେବା ଭୟଙ୍କର ଭାବେ ବାଧାପ୍ରାପ୍ତ ହୋଇଛି । ଋଣଭାରରେ ବୁଡିରହିଥିବା ଶ୍ରୀଲଙ୍କାରେ ଏବେ ବିଦେଶୀ ମୁଦ୍ରାର ଘୋର ଅଭାବ । ସ୍ଥିତି ଏଭଳି ହୋଇଛି ଯେ, ପେଟ୍ରୋଲ ପମ୍ପରେ ସେନାକୁ ମୁତୟନ କରାଯାଇଛି । ତେବେ ସ୍ୱାଧୀନତା ପରେ ଏହା ଶ୍ରୀଲଙ୍କା ପାଇଁ ସବୁଠୁ ବଡ ସଙ୍କଟ ଭାବେ ଉଭା ହୋଇଛି । ମାତ୍ର ୨୨ କୋଟି ଜନସଂଖ୍ୟା ବିଶିଷ୍ଟ ଶ୍ରୀଲଙ୍କାରେ ଏବେ ଔଷଧ ପାଇଁ ବି ହାହାକାର ପଡିଛି । ଲୋକଙ୍କୁ ରୋଷେଇ ପାଇଁ କିରୋସିନି ତେଲ କିମ୍ବା ଏଲପିଜି ସିଲିଣ୍ଡର ମିଳୁନାହିଁ । କେବଳ ଜରୁରୀ ସେବା ପାଇଁ ଇନ୍ଧନ ମହଜୁଦ ରଖାଯାଇଛି । ଏପରିକି ଶ୍ରୀଲଙ୍କାରେ ଏବେ ସ୍କୁଲ ଗୁଡିକୁ ବନ୍ଦ କରାଯାଇଛି ।