ପ୍ରଥମ ମହିଳା ଆମ୍ବୁଲାନ୍ସ ଡ୍ରାଇଭର

ଆଜିକାଲି ବିଭିନ୍ନ କ୍ଷେତ୍ରରେ ମହିଳାଙ୍କର ଅଦମ୍ୟ ଇଛା ଶକ୍ତିର ଉଦାହରଣ ଦେଖିବାକୁ ମିଳୁଛି । ମହିଳାଙ୍କ ପାଇଁ ରହିଥିବା ଅନେକ ଦିନର ପରମ୍ପରାକୁ ଭାଙ୍ଗି ଆଗକୁ ବଢିବାର ଅନେକ ଉଦାହରଣ ଦେଖିବାକୁ ମିଳିଥାଏ । ସେହିଭଳି ଜଣେ ମହିଳା ହେଲେ କେରଳର ଦିପାମୋଲ୍‌ । ୪୨ ବର୍ଷୀୟ ଦିପାମୋଲ ପାଲଟିଛନ୍ତି କେରଳର ପ୍ରଥମ ଆମ୍ବୁଲାନ୍ସ ଡ୍ରାଇଭର । ଦିପା ବର୍ତ୍ତମାନ ଅନେକ ମହିଳାଙ୍କର ପ୍ରେରଣା ପାଲଟିଛନ୍ତି । ଦିପାଙ୍କର ସାହସ ଦେଖି ଅନେକ ମହିଳା ଏହି କ୍ଷେତ୍ରରେ କାମ କରିବାକୁ ଆଗେଇ ଆସିବେ । ଦିପାଙ୍କର ଇଚ୍ଛାକୁ ସମ୍ମାନ ଦେଇ ସରକାରଙ୍କ ପକ୍ଷରୁ ଏ ନେଇ ତାଙ୍କୁ ସାହାଯ୍ୟ କରାଯାଇଥିଲା । ବର୍ତ୍ତମାନ ଦିପା ପାଲଟିଛନ୍ତି ରାଜ୍ୟର ପ୍ରଥମ ମହିଳା ଆମ୍ବୁଲାନ୍ସ ଡ୍ରାଇଭର । ତାଙ୍କର ପିଲାଦିନରୁ ଗାଡି ଚଳାଇବା ପାଇଁ ଅହେତୁକ ଦୁର୍ବଳତା ଥିଲା । କେବଳ ଗାଡି ଚଳାଇବା ନୁହେଁ ସମାଜ ସେବାରେ ମଧ୍ୟ ସେ ମନଦେଉଥିଲେ । ତେଣୁ ଦୁଇଟି ଯାକ ଇଛାକୁ ପୂରଣ କରିବା ପାଇଁ ସେ ଏହି ରାସ୍ତା ବାଛିଥିଲେ । ୨୦୦୮ରେ ସେ ନିଜର ଡ୍ରାଇଭିଂ ଲାଇସେନ୍ସ ପ୍ରାପ୍ତ କରିଥିଲେ । ସେହିଭଳି ୨୦୦୯ରେ ସେ ବଡଗାଡି ଚଳାଇବାର ଲାଇସେନ୍ସ ପାଇଥିଲେ । ଦିପାଙ୍କର ନିଜର ଏକ ଛୋଟ ଡ୍ରାଇଭିଂ ସ୍କୁଲ ମଧ୍ୟ ରହିଛି । ପରିବାର ପ୍ରତିପୋଷଣ ପାଇଁ ଦିପା ନିଜର ଡାଇଭିଂକୁ କ୍ୟାରିୟର ଭାବେ ଗ୍ରହଣ କରିଥିଲେ । ଦିପାଙ୍କ କାହାଣୀ ସୋସିଆଲ ମିଡିଆରେ ଭାଇରାଲ ହେବାପରେ ବର୍ତ୍ତମାନ ଅନେକ ମହିଳାଙ୍କ ପାଇଁ ସେ ପ୍ରେରଣା ସାଜିଛନ୍ତି ।