ଦଳରେ ନୂତନ ପ୍ରାଣଶକ୍ତି ସଞ୍ଚାର କରିବ ‘ଭାରତ ଯୋ‌ଡ଼ୋ ଯାତ୍ରା’: ସୋନିଆ

କଂଗ୍ରେସର ଗଣସମ୍ପର୍କ ଅଭିଯାନ ‘ଭାରତ ଯୋ‌ଡ଼ୋ ଯାତ୍ରା’ । ଏହି ଅଭିଯାନ ଦଳରେ ନୂତନ ପ୍ରାଣଶକ୍ତି ସଞ୍ଚାର କରାଇବାରେ ସହାୟକ ହେବ ବୋଲି ସୋନିଆ ଗାନ୍ଧୀ କହିଛନ୍ତି । ଆଜି କଂଗ୍ରେସ ନେତା ରାହୁଲ୍‌ ଗାନ୍ଧୀ କନ୍ୟାକୁମାରୀର ଅଗସ୍ତୀସ୍ବରମ୍‌ରୁ ଉପରୋକ୍ତ ପଦଯାତ୍ରାର ଦ୍ବିତୀୟ ଦିବସ ଆରମ୍ଭ କରିବା ଅବସରରେ ସୋନିଆ ଗାନ୍ଧୀ ଏଭଳି ବିବୃତି ଦେଇଛନ୍ତି । ବର୍ତ୍ତମାନ ସ୍ବାସ୍ଥ୍ୟ ପରୀକ୍ଷା ନିମନ୍ତେ ବିଦେଶରେ ଥିବା ସୋନିଆ ଗାନ୍ଧୀ ଦେଇଥିବା ବିବୃତିରେ କହିଛନ୍ତି, କଂଗ୍ରେସ ପାଇଁ ଭାରତ ଯୋଡ଼ୋ ଯାତ୍ରା ହେଉଛି ସ୍ମରଣୀୟ ମୁହୂର୍ତ୍ତ । କଂଗ୍ରେସର ପୁନଃ ପ୍ରାଣସଞ୍ଚାର କ୍ଷେତ୍ରରେ ଏହି ପଦଯାତ୍ରା ପ୍ରମୁଖ ଭୂମିକା ଗ୍ରହଣ କରିବ । ଭାରତୀୟ ରାଜନୀତିରେ ଏହା ରୂପାନ୍ତରଣ ମୁହୂତ୍ତ ହେବ । ସେ ଆହୁରି ମଧ୍ୟ କହିଛନ୍ତି ଯେ, ଯେଉଁମାନେ ପ୍ରତ୍ୟକ୍ଷଭାବେ ଉପସ୍ଥିତ ‌ହୋଇ ଚିନ୍ତା ଓ ଚେତନାରେ ‘ଭାରତ ଯୋଡ଼ୋ ଯାତ୍ରା’ରେ ଭାଗ ନେଇ ପାରିବେ । ଚାଲନ୍ତୁ, ଏକତ୍ର ହୋଇ ଅଗ୍ରସର ହେବାକୁ ଶପଥ ନେବା ।