ଡେଙ୍ଗୁ ବଢ଼ିବାର ମୁଖ୍ୟ କାରଣ କୋଭିଡ୍ !

ଗତ ୨-୩ବର୍ଷ ଧରି ରାଜଧାନୀ ଓ ରାଜ୍ୟରେ ଡେଙ୍ଗୁ ରୋଗୀଙ୍କ ସଂଖ୍ୟା ବଢ଼ୁଛି । ଚଳିତମାସ ୨ ତାରିଖ ସୁଦ୍ଧା ରାଜ୍ୟରେ ୧୧,୫୭୫ ନମୁନା ପରୀକ୍ଷା ହୋଇଛି । ସେଥିରୁ ୧୯୭ଜଣ ଡେଙ୍ଗୁ ରୋଗୀ ଚିହ୍ନଟ ହୋଇଛନ୍ତି । ଏଥିରେ ଖୋର୍ଧା ଜିଲ୍ଲାର ୧୦୫ ରୋଗୀ ରହିଛନ୍ତି । ଆଉ ମୁଖ୍ୟତଃ ଡେଙ୍ଗୁର ହଟସ୍ପଟ ପାଲଟିଛି ଭୁବନେଶ୍ୱର । ରାଜ୍ୟର ୧୮ ଜିଲ୍ଲାରେ ଡେଙ୍ଗୁ ରୋଗୀ ଚିହ୍ନଟ ହେଲେଣି । ତେବେ ଡେଙ୍ଗୁ ବ୍ୟାପିବା ନେଇ ତନାଘନା ବେଳେ ସାମ୍ନାକୁ ଆସୁଛି ଚମକାଇ ଦେଲାଭଳି ଏକ ତଥ୍ୟ । ଡେଙ୍ଗୁ ବ୍ୟାପିବା ପଛରେ ରହିଛି କୋଭିଡ୍ । କୋଭିଡ ବେଳେ ଲକଡାଉନ ଓ ସଟଡାଉନ ପାଇଁ ପାର୍କଠାରୁ ଆରମ୍ଭ କରି ଗାଡ଼ି, ଡଷ୍ଟବିନ୍, ପାଣି ଟାଙ୍କି ଓ ଅନ୍ୟାନ୍ୟ ସ୍ଥାନ ଠିକ୍ ସମୟରେ ସଫା ହୋଇପାରି ନ ଥିଲା । ଡେଙ୍ଗୁ ଜ୍ୱର ଏଡିସ୍ ମଶା କାମୁଡ଼ିବା ଦ୍ୱାରା ହୋଇଥାଏ । ସାଧାରଣତଃ ଏହି ମଶା ସକାଳ ଓ ସଂଧ୍ୟା ସମୟରେ କାମୁଡ଼ିଥାନ୍ତି । ସ୍ୱଚ୍ଛ ପାଣିରେ ବଂଶ ବିସ୍ତାର କରିଥାଏ । ଏଡିସ୍ ମଶାର ଅଣ୍ଡା ବର୍ଷେରୁ ଦୁଇ ବର୍ଷ ପାଇଁ ସତେଜ ରହିଥାଏ । କଠିନ ବର୍ଜ୍ୟବସ୍ତୁ ସହିତ ଏଡିସ୍ ମଶାର ଅଣ୍ଡା ଲାଗି ରହିଥାଏ । ବର୍ଷା ଋତୁ ଆସିବା ପରେ ପାଣି ସଂସ୍ପର୍ଶରେ ଆସି ଅଣ୍ଡାରୁ ଛୁଆ ବାହାରିଥାଏ ।