ଓ୍ବେବସାଇଟ ଓ ଡିଜିଟାଲ ଭିତ୍ତିଭୂମି ଉପରେ ଆଟାକ !

ଭାରତୀୟ ଓ୍ବେବସାଇଟ ଓ ଡିଜିଟାଲ ଭିତ୍ତିଭୂମି ଉପରେ ହୋଇପାରେ ଆଟାକ । ପାକିସ୍ତାନ ଓ ଇଣ୍ଡୋନେସିଆର କେତେକ ପ୍ରମୁଖ ହ୍ୟାକର ଗ୍ରୁପ ଏକ ସାଇବର ପାର୍ଟି ଆୟୋଜନ କରୁଥିବା ଜଣାପଡ଼ିଛି । ଏନେଇ ସୂଚନା ମିଳିବା ପରେ ଦେଶରେ ଆଲର୍ଟ ଜାରି କରାଯାଇଛି । ଏଥିପାଇଁ ସାଇବର ସିକ୍ୟୁରିଟି ନେଇ ବିଭିନ୍ନ ମନ୍ତ୍ରାଳୟ ଓ ବିଭାଗ ପକ୍ଷରୁ ନିଆଯାଇଛି ପଦକ୍ଷେପ । ଏହି ହ୍ୟାକର ଗ୍ରୁପରେ ୪ ହଜାରରୁ ଅଧିକ ବ୍ୟକ୍ତିବିଶେଷ ସାମିଲ ରହିଛନ୍ତି । ବିଶେଷ କରି ଦେଶର ଡିଜିଟାଲ ଭିତ୍ତିଭୂମି ନଷ୍ଟ କରିବା ସେମାନଙ୍କ ଉଦ୍ଦେଶ୍ୟ ବୋଲି ବିଚାର କରିଛନ୍ତି ଗୁଇନ୍ଦା ବିଭାଗ । ବିଭିନ୍ନ ଓ୍ବେବସାଇଟରେ ଯେପରି ବେଆଇନ ଆକ୍ସେସ ହୋଇପାରିବ ନାହିଁ ସେଥିଲାଗି ଗୁରୁତ୍ବ ଦିଆଯାଇଛି । ଡାଟାଗୁଡିକର ସୁରକ୍ଷା ଲାଗି ସାଇବର ହାଇଜିନ ଷ୍ଟାଣ୍ଡାର୍ଡ ଅପରେଟିଂ ପ୍ରକ୍ରିୟା ଅବଲମ୍ବନ ଲାଗି ପରାମର୍ଶ ଦିଆଯାଇଛି । କେନ୍ଦ୍ରୀୟ ସଂସ୍ଥା ଆଶଙ୍କା କରିଛନ୍ତି ସ୍ବାସ୍ଥ୍ୟ କ୍ଷେତ୍ରର ସାଇବର ଭିତ୍ତିଭୂମିକୁ ପ୍ରାଇମ ଟାର୍ଗେଟ କରାଯାଇଛି । ହ୍ୟାକର ଗ୍ରୁପର ଟାର୍ଗେଟରେ ସ୍ବାସ୍ଥ୍ୟ ଭିତ୍ତିଭୂମି ରହିଛି ।