ଇନଫ୍ଲୁଏଞ୍ଜାକୁ ନେଇ ICMRର ନିର୍ଦ୍ଦେଶାବଳୀ

ଭାରତର ବିଭିନ୍ନ ପ୍ରାନ୍ତରେ ଏବେ ଲୋକମାନେ ଜ୍ୱର, କାଶ ଓ ଥଣ୍ଡା ଭଳି ଲକ୍ଷଣ ଥିବା ରୋଗରେ ପଡ଼ିବାରେ ଲାଗିଛନ୍ତି । ବିଗତ ଦୁଇ ମାସ ହେଲାଣି ସମସ୍ତଙ୍କୁ ଏହି ଲକ୍ଷଣ ସବୁ ଦେଖାଯାଉଛି । ଦୀର୍ଘଦିନ ଧରି ଜ୍ୱର ଓ କାଶ ଲାଗି ରହୁଛି । ମହାମାରୀ କରୋନା ସହ ୨ ବର୍ଷ ଲଢ଼ିଥିବା ଲୋକମାନେ ଏବେ ପୁଣି ଥଣ୍ଡା, କାଶ ଓ ଜ୍ୱରକୁ ଦେଖି ଆତଙ୍କିତ ହେବାରେ ଲାଗିଛନ୍ତି । ଏସବୁ ଭିତରେ କେନ୍ଦ୍ର ସରକାର ସତର୍କ ସୂଚନା ବା ଆଡଭାଇଜରୀ ଜାରି କରିଛନ୍ତି। ଆଇସିଏମଆର କହିଛି ଯେ ସମଗ୍ର ଦେଶରେ ଏବେ ଜ୍ୱର ଓ ଫ୍ଲୁ ମାମଲାର ବଢ଼ିବାରେ ଲାଗିଛି । ଇନଫ୍ଲୁଏଞ୍ଜା ଏ ସବଟାଇପ ଏଚ୩ଏନ୨ ଭାଇରସ ଯୋଗୁ ଏପରି ଘଟଣା ସାମ୍ନାକୁ ଆସୁଛି । ଅନ୍ୟ ସବ ଟାଇପ ଅପେକ୍ଷା ଏଚ୩ଏନ୨ ଭାଇରସ ଯୋଗୁ ହସ୍ପିଟାଲରେ ଭର୍ତ୍ତି ହେବାର ଆଶଙ୍କା ରହିଛି। ବିଶେଷଜ୍ଞଙ୍କ ମତରେ ବିଗତ ୨ରୁ ୩ ମାସ ହେଲାଣି ଏଚ୩ଏନ୨ ଭାଇରସ ଦ୍ରୁତଗତିରେ ବ୍ୟାପିବାରେ ଲାଗିଛି।