ଆସନ୍ତା ସେପ୍ଟେମ୍ବରରେ ଭାରତ ଆୟୋଜନ କରିବ ଜି-୨୦ ଶିଖର ସମ୍ମିଳନୀ

ଆସନ୍ତାବର୍ଷ ସେପ୍ଟେମ୍ବରରେ ଭାରତ ଆୟୋଜନ କରିବ ଜି-୨୦ ଶିଖର ସମ୍ମିଳନୀ । ସେପ୍ଟେମ୍ବର ୯-୧୦ରେ ଭାରତ ଜି-୨୦ ନେତାମାନଙ୍କର ଶିଖର ସମ୍ମିଳନୀ ଆୟୋଜନ କରିବ ଏବଂ ଚଳିତବର୍ଷ ଡିସେମ୍ବର ପହିଲାରୁ ଏହା ଉକ୍ତ ରଣନୈତିକ ବହୁପାକ୍ଷିକ ମଞ୍ଚର ଅଧ୍ୟକ୍ଷ ଦାୟିତ୍ବ ବହନ କରିବ । ଭାରତ ସରକାର ମଙ୍ଗଳବାର କରିଥିବା ଘୋଷଣା ଅନୁସାରେ ଡିସେମ୍ବର ୧, ୨୦୨୨ରୁ ନଭେମ୍ବର ୩୦, ୨୦୨୩ ପର୍ଯ୍ୟନ୍ତ ଭାରତ ହାତରେ ରହିବ ୧୯ଟି ବିକଶିତ ଓ ବିକାଶଶୀଳ ଦେଶ ଏବଂ ୟୁରୋପୀୟ ୟୁନିୟନକୁ ନେଇ ଗଠିତ ମଞ୍ଚ ଜି-୨୦ର ଅଧ୍ୟକ୍ଷ ପଦ । ତେଣୁ ଆସନ୍ତା ବର୍ଷ ହେବାକୁ ଯାଉଥିବା ଜି-୨୦ ସମ୍ମିଳନୀର ଆୟୋଜନ ଦାୟିତ୍ବ ନେଉଛି ଭାରତ । ଏଥିରେ ସମସ୍ତ ସଭ୍ୟ ରାଷ୍ଟ୍ରର ରାଷ୍ଟ୍ରମୁଖ୍ୟ ବା ପ୍ରତିନିଧିମାନେ ଯୋଗ ଦେବେ, ଏହାସହ ବାଂଲାଦେଶ, ଇଜିପ୍ଟ, ମରିସସ, ନେଦରଲାଣ୍ଡ, ନାଇଜେରିଆ, ଓମାନ, ସିଙ୍ଗାପୁର, ସ୍ପେନ ଓ ୟୁଏଇକୁ ମଧ୍ୟ ଅତିଥି ଭାବେ ନିମନ୍ତ୍ରଣ କରିବ । ଏଥିସହ ଆଇଏସ୍‌ଏ, ସିଡିଆର୍‌ଆଇ ଓ ଏଡିବିକୁ ମଧ୍ୟ ଭାରତ ଅନ୍ତର୍ଜାତୀୟ ଅତିଥି ସଂଗଠନ ଭାବେ ନିମନ୍ତ୍ରଣ କରିବ । ପଡ଼ୋଶୀ ଦେଶ ଭିତରେ କେବଳ ବାଂଲାଦେଶ ହିଁ ଭାରତର ନିମନ୍ତ୍ରିତ ଅତିଥି ତାଲିକାରେ ରହିବ ବୋଲି ସରକାରୀ ସୂତ୍ରରୁ ଜଣାପଡ଼ିଛି।