ଆଠମଲ୍ଲୀକ ଗାଦି ଛାଡିଲେ ରମେଶ

ଦେଶରେ ଚାଲିଛି ନିର୍ବାଚନି ମାହୋଲ । ଆଉ ଦଳ ଡିଆଁ କାର୍ଯ୍ୟକ୍ରମରେ ଲାଗିଛି ସ୍ପିଡୋ ମିଟର । ଯୋଉଠିକି ନଜର ପକାଇବେ, ଜଣଙ୍କ ପରେ ଦେଉଛନ୍ତି ଛତ୍ରଭଙ୍ଗ । ଏ ଦଳରୁ ଡେଉଁଛନ୍ତି ସେ ଦଳକୁ । ଏହାରି ଭିତରେ ବିଜେଡିକୁ ଲାଗୁଛି ବଡ ବଡ ଝଟକା । ଜଣଙ୍କ ପରେ ଜଣେ ହେବିୱେଟ୍ ଛାଡୁଛନ୍ତି ଦଳ । ନିକଟରେ ଓଡିଆ ତାରକା ସିଦ୍ଧାନ୍ତ ମହାପାତ୍ର ଓ ଅନୁଭବ ମହାନ୍ତି ଦଳ ଛାଡିବା ନେଇ ଚର୍ଚ୍ଚା ଥମିନଥିବା ବେଳେ ପୁଣି ମୁଣ୍ଡ ଟେକିଲାଣି ଆଉ ଏକ ସମସ୍ୟା । ତେବେ ବିଧାନସଭା ନିର୍ବାଚନମଣ୍ଡଳୀ ପାଇଁ ପ୍ରାର୍ଥୀଙ୍କ ତୃତୀୟ ତାଲିକା ଘୋଷଣା ପରେ ଦଳର ପ୍ରାଥମିକ ସଦସ୍ୟତାରୁ ଇସ୍ତଫା ଦେଇଛନ୍ତି। ସମ୍ବଲପୁର ଲୋକସଭା ନିର୍ବାଚନମଣ୍ଡଳୀ ଅନ୍ତର୍ଗତ ଆଠମଲ୍ଲୀକ୍ ବିଧାନସଭା ବିଭାଗର ବିଧାୟକ ରମେଶ ଚନ୍ଦ୍ର ସାଇ ଗୁରୁବାର ଦଳର ପ୍ରାଥମିକ ସଦସ୍ୟତାରୁ ଇସ୍ତଫା ଦେଇଛନ୍ତି।

ଯଦିଓ ସାଇ ଦଳରୁ ବାହାରକୁ ଯିବାର ବ୍ୟକ୍ତିଗତ କାରଣ ଉଲ୍ଲେଖ କରିଛନ୍ତି, ଏକ ଭିଡିଓ ବାର୍ତ୍ତାରେ ସେ ସ୍ପଷ୍ଟ କରିଛନ୍ତି ଯେ ଦଳ ଦ୍ବାରା ଟିକେଟ୍ ପ୍ରତ୍ୟାଖ୍ୟାନ, ତାଙ୍କୁ ଇସ୍ତଫା ଦେବାକୁ ବାଧ୍ୟ କରିଛି। ଏଥିରେ ଅସନ୍ତୁଷ୍ଟ ନେତା କହିଛନ୍ତି ଯେ ତାଙ୍କ ସମର୍ଥକଙ୍କ ସହ ଆଲୋଚନା ପରେ ସେ ଏହି ନିଷ୍ପତ୍ତି ନେଇଛନ୍ତି। ସେ କହିଛନ୍ତି-

“ଗତ ପାଞ୍ଚ ବର୍ଷ ଧରି ଆପଣଙ୍କ ସହ କାମ କରିବା ଏକ ସୌଭାଗ୍ୟ ଏବଂ ଗୌରବର ବିଷୟ ଏବଂ ଏହା ମୋ ପାଇଁ ଏକ ଭଲ ଶିକ୍ଷା ପ୍ରକ୍ରିୟା ଅଟେ। ତଥାପି ବ୍ୟକ୍ତିଗତ କାରଣରୁ ମୁଁ ପାର୍ଟିରେ ମୋର ସ୍ଥିତି ଜାରି ରଖିବାରେ ଅସମର୍ଥ ତେଣୁ ପ୍ରାଥମିକ ସଦସ୍ୟତାରୁ ଇସ୍ତଫା ଦେଇଛି। ବିଜୁ ଜନତା ଦଳ ସଭାପତି ତଥା ଓଡିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ସେ ଏହି ପତ୍ର ଲେଖିଛନ୍ତି। ତେବେ ତାଙ୍କ ବଦଳରେ ବିଜେଡି ନଳିନୀକାନ୍ତ ପ୍ରଧାନଙ୍କୁ ଆଠମଲ୍ଲୀକରୁ ମନୋନୀତ କରିଛି ।