ଆଜିଠୁ ପୁଣି ଆରମ୍ଭ ହେବ ଭାରତ ଯୋଡ଼ ନ୍ୟାୟ ଯାତ୍ରା

ଦୁଇଦିନର ବ୍ରେକ ପରେ ଆଜିଠାରୁ ପୁଣି ଆଣମ୍ଭ ହେବାକୁ ଯାଉଛି ବରିଷ୍ଠ କଂଗ୍ରେସ ନେତା ରାହୁଲ ଗାନ୍ଧୀଙ୍କ ଭାରତ ଯୋଡ଼ ନ୍ୟାୟ ଯାତ୍ରା । ପଶ୍ଚିମବଙ୍ଗର ଜଲପାଇଗୁଡିରୁ ଆରମ୍ଭ ହେବ ଏହି ଯାତ୍ରା । ଗତ ଜାନୁଆରୀ ୧୪ ତାରିଖରୁ ମଣିପୁରରୁ ଆରମ୍ଭ ହୋଇଥିବା ଯାତ୍ରା ପଶ୍ଚିମବଙ୍ଗରେ ଦୁଇ ଦିନ ପାଇଁ ବନ୍ଦ ଥିଲା । ଭାରତ ଯୋଡ଼ ନ୍ୟାୟ ଯାତ୍ରା ୧୨ ଦିନ ଧରି ମଣିପୁର, ମେଘାଳୟ, ଆସାମ ଓ ଅରୁଣାଚଳ ପ୍ରଦେଶ ଅତିକ୍ରମ କରିବା ପରେ ପଶ୍ଚିମବଙ୍ଗରେ ପ୍ରବେଶ କରିଥିଲା । ମଣିପୁରରୁ ମୁମ୍ବାଇ ପ୍ରାୟ ୬ ହଜାର ୭ ଶହ କିଲୋମିଟର ଅତିକ୍ରମ କରିବ ଯାତ୍ରା । ଦେଶରେ ଦାରିଦ୍ର୍ୟ, ବେକାରୀ, ଅସହିଷ୍ଣୁତା, ବିଦ୍ବେଷ ବିରୋଧରେ ରାହୁଲ ଗାନ୍ଧୀଙ୍କ ନେତୃତ୍ବରେ ଚାଲିଛି ଏହି ଯାତ୍ରା । ବିଭିନ୍ନ ରାଜ୍ୟରେ ହଜାର ହଜାର କର୍ମୀ ଏଥିରେ ସାମିଲ ହେଉଛନ୍ତି । ଆସନ୍ତା ୨୦ ମାର୍ଚ୍ଚରେ ମୁମ୍ବାଇରେ ଏହା ଶେଷ ହେବ ।