ଆଜିଠୁ କଂଗ୍ରେସର ‘ହାଥ୍ ସେ ହାଥ୍ ଯୋଡୋ’

ଆଜି ସାଧାରଣତନ୍ତ୍ର ଦିବସରୁ ୨ମାସ ଧରି ‘ହାଥ୍ ସେ ହାଥ୍ ଯୋଡ଼ୋ’ କାର୍ଯ୍ୟକ୍ରମ ଆରମ୍ଭ କରିଛି ଅଖିଳ ଭାରତ କଂଗ୍ରେସ କମିଟି । ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ବିଫଳତାକୁ ପ୍ରତି ବ୍ଲକ୍ ଓ ପଞ୍ଚାୟତସ୍ତରରେ ଦଳ ଏହି କାର୍ଯ୍ୟକ୍ରମ ଜରିଆରେ ପହଞ୍ଚାଇବ ।  କଂଗ୍ରେସ ଭବନରେ ଆୟୋଜିତ ସାମ୍ବାଦିକ ସମ୍ମିଳନୀରେ ପୂର୍ବତନ କେନ୍ଦ୍ରମନ୍ତ୍ରୀ ସୁବୋଧକାନ୍ତ ସହାୟ ଏହା କହିଛନ୍ତି । ସେ କହିଛନ୍ତି ରାହୁଳ ଗାନ୍ଧୀଙ୍କ ନେତୃତ୍ବରେ ‘ଭାରତ ଯୋଡ଼ୋ’ ଯାତ୍ରା ଦେଶବାସୀଙ୍କ ମଧ୍ୟରେ ଆଲୋଡ଼ନ ସୃଷ୍ଟି କରିଛି। କେନ୍ଦ୍ରର ମୋଦୀ ସରକାରଙ୍କ ବହୁ ଘୋଷିତ ସ୍ଲୋଗାନ୍ ‘ସବ୍‌କା ସାଥ, ସବ୍‌କା ବିକାଶ, ସବ୍‌କା ବିଶ୍ବାସ’ ଧୂଆଁବାଣରେ ପରିଣତ ହୋଇଛି । ବାସ୍ତବରେ ଏହା ‘କୁଛ କା ସାଥ, ଖୁଦ୍‌ କା ବିକାଶ ଓ ସବ୍‌ କା ସାଥ-ବିଶ୍ବାସଘାତ’ ଭଳି ଅନୁଭବ ହେଉଛି । ଦେଶବାସୀଙ୍କ ଦୁର୍ଦ୍ଦଶା ବଢ଼ି ବଢ଼ି ଚାଲିଛି । ସେହିପରି ଅକ୍ସଫାମ୍ ରିପୋର୍ଟ ଅନୁସାରେ ଦେଶରେ ଅର୍ଥନୈତିକ ଅସମତା ବୃଦ୍ଧି ପାଇଛି । ୧ଭାଗ ଲୋକଙ୍କ ପାଖରେ ଦେଶର ୪୧ ଭାଗ ସଂପତ୍ତି ରହିଛି। ଯାହାକି ଚିନ୍ତାଜନକ ।