୮ବର୍ଷରେ ମାତ୍ର ଗୋଟିଏର ବିଚାର ସରିଛି; ଚିଟ୍‌ଫଣ୍ଡ ମାମଲାରେ ସିବିଆଇର ମନ୍ଥର ଗତି

ଚିଟ୍‌ଫଣ୍ଡ ମାମଲାରେ ସିବିଆଇର ମନ୍ଥର ଗତି । ଏନେଇ ସୂଚନାଧିକାର କର୍ମୀ ଅଖଣ୍ଡ ଆଜି ଗଭୀର ଉଦ୍‌ବେଗ ପ୍ରକାଶ କରିଛନ୍ତି । ତାଙ୍କ କହିବା ମୁତାବକ ୮ବର୍ଷରେ ମାତ୍ର ଗୋଟିଏର ବିଚାର ସରିଛି । ୨୦୧୪ ମସିହାରୁ ସିବିଆଇ ରାଜ୍ୟରେ ମୋଟ ୨୯ଟି ଚିଟ୍‌ଫଣ୍ଡ୍‌ ମାମଲାର ତଦନ୍ତ କରୁଥିଲେ ହେଁ ମାତ୍ର ଗୋଟିଏ ମାମଲାର ବିଚାର ଶେଷ ହୋଇଛି । ୧୬ଟି ମାମଲାର ତଦନ୍ତ ଶେଷ ହୋଇ ଭୁବନେଶ୍ୱର ସ୍ୱତନ୍ତ୍ର ସିବିଆଇ କୋର୍ଟରେ ବିଚାର ଚାଲିଛି । କିନ୍ତୁ ଏବେ ବି ୧୨ଟି ସଂସ୍ଥା ବିରୋଧରେ ସିବିଆଇର ଖୋଳତାଡ଼ ସରିନି । କୋର୍ଟରେ ଏହି ମାମଲାଗୁଡ଼ିକର ଚାର୍ଜସିଟ୍ ଦାଖଲ କରାଯାଇଥିଲେ ହେଁ ଅଧିକ ଅଭିଯୁକ୍ତଙ୍କ ସଂପୃକ୍ତି ଥିବା ଆଶଙ୍କାରେ ସିବିଆଇ ଶେଷ ଚାର୍ଜସିଟ୍‌ ଦାଖଲ କରିନାହିଁ । ତେବେ ସୂଚନା ଅଧିକାର ଆଇନ ବଳରେ ଏସବୁ ତଥ୍ୟ ମିଳିଛି । ତେବେ ତଦନ୍ତ ପ୍ରକ୍ରିୟା ବିଳମ୍ବ ଦ୍ୱାରା ଅନେକ ସାକ୍ଷ୍ୟ, ପ୍ରମାଣ ନଷ୍ଟ ହେବାର ଆଶଙ୍କା ରହିଛି । ଫଳରେ ବିଚାର ବେଳେ ଦୋଷୀମାନଙ୍କୁ ଖସିବା ସହଜ ହେବ । ଖାଲି ସେତିକି ନୁହେଁ ସୂଚନାଧିକାର କର୍ମୀ ଭୁବନେଶ୍ବର ସିବିଆଇର ତଦନ୍ତ ପ୍ରକ୍ରିୟା ଏତେ ଶିଥିଳ କାହିଁକି ବୋଲି ପ୍ରଶ୍ନ କରିଛନ୍ତି । ଏହାଛଡ଼ା ସିବିଆଇ ଏ ପର୍ଯ୍ୟନ୍ତ ଚିଟ୍‌ଫଣ୍ଡ ମାମଲାରେ ଓଡ଼ିଶାରେ କେତେ ଅଭିଯୁକ୍ତଙ୍କୁ ଗିରଫ କରିଛି, ଆଉ କେତେ ଅଭିଯୁକ୍ତ ଅଛନ୍ତି‌; ସେ ସମ୍ପର୍କରେ ମଧ୍ୟ ସିବିଆଇ କୌଣସି ତଥ୍ୟ ପ୍ରଦାନ କରୁନାହିଁ । ଏହି ସ୍ପର୍ଶକାତର ଘଟଣାର ତଦନ୍ତ ଓ ବିଚାର ପ୍ରକ୍ରିୟା ଏତେ ମନ୍ଥର ଚାଲିଲେ, ସର୍ବସ୍ବାନ୍ତ ହୋଇଥିବା ଓଡ଼ିଶାର ଲକ୍ଷଲକ୍ଷ ଗରିବ ଜନସାଧାରଣ କେମିତି ନ୍ୟାୟ ପାଇବେ ବୋଲି ସେ ପ୍ରଶ୍ନ କରିଛନ୍ତି ।